ایران میں ایک عدالت نے ملک کے سابق نائب صدر اور دارالحکومت تہران کے سابق میئر محمد علی نجفی کو اپنی دوسری بیوی کے قتل کے جُرم میں سزائے موت کا حکم دیا ہے۔
تفصیلات کے مطابق ایران کے سرکاری ٹی وی نے عدلیہ کے ترجمان غلام حسین اسماعیلی کے حوالے سے بتایا ہے کہ عدالت نے محمد علی نجفی کو اپنی بیوی مطرا اوستاد کو گولی مارنے کے جرم میں قصور وار ثابت ہونے پرپھانسی کی سزا سنائی ہے اور وہ اس سزا کے خلاف اعلیٰ عدالت میں بیس روز میں اپیل دائر کرسکتے ہیں۔
پولیس نے نجفی کومئی میں گرفتار کیا تھا۔انھوں نے خود کو حکام کے حوالے کردیا تھا اور اپنی بیوی کے قتل کے واقعے کا اقرار کیا تھا۔حکام کے مطابق مقتولہ اوستاد محمد علی نجفی کی دوسری بیوی تھی اور ان دونوں کے درمیان گھریلو ناچاقی چلی آرہی تھی۔
واضح رہے کہ ایران کی سیاسی اور صاحبِ ثروت اشرافیہ میں بندوق سے تشدد کے واقعات شاذ و نادر ہی پیش آتے ہیں.ہ نجفی جو ایک نمایاں اصلاح پسند سیاستدان تھے نے اپنی بیوی مترا اوستاد کو اپنے گھر میں 28 مئی کو فائرنگ کرکے قتل کردیا تھا۔ ایرانی میڈیا کے مطابق نجفی نے اہلیہ کو قتل کرنے کے بعد خود کو پولیس کے حوالے کردیا تھا اور اعتراف جرم کرلیا تھا۔
