مکہ مکرمہ، مناسک حج کی ادائیگی کے لیےعازمین استقبالیہ پوائنٹس پر پہنچنا شروع

مکہ مکرمہ،مناسک حج کی ادائیگی کے لیے عازمین استقبالیہ پوائنٹس پر پہنچنا شروع ہو گئے ہیں-

باغی ٹی وی : عرب میڈیا کے مطابق مکہ مکرمہ، مناسک حج کی ادائیگی کے لیے عازمین استقبالیہ پوائنٹس پر پہنچنا شروع ہو گئے ہیں سعودی حکام کا کہنا ہے کہ اندرون ملک سے 60ہزار افراد استقبالیہ پوائنٹس پر جمع ہو رہے ہیں –

سعودی حکام کے مطابق خصوصی بسوں کے ذریعے عازمین کو مختلف اوقات میں مکہ مکرمہ پہنچایا جائے گا،60ہزارحجاج کرام کو 8 ذوالحج نماز ظہر سے قبل منیٰ پہنچایا جائے گا-

واضح رہے کہ اردو عربیہ نے اپنی رپورٹ میں بتایا تھا کہ سعودی وزارت حج و عمرہ نے اس سال عازمین حج کے استقبال کے لیے مکہ مکرمہ میں چار مراکز تیار کیے ہیں۔ مسجد الحرام جانے سے قبل حجاج کرام کا النواریۃ، الزایدی، الشرائع اور الھدا میں خیر مقدم کیا جائے گا۔ خصوصی حفاظتی اقدامات کیے جائیں گے۔

نائب وزیر حج و عمرہ ڈاکٹر عبدالفتاح مشاط کے مطابق وزارت نے استقبالیہ مراکز میں عازمین کے استقبال کے تین طریقہ کار متعین کیے ہیں۔

رپورٹ کے مطابق پہلا طریقہ یہ ہو گا کہ جو عازمین حج کمپنیوں کے ساتھ تعاون سے وزارت کی منظور شدہ بسوں سے پہنچیں گے۔ ان کے اجازت نامے چیک کیے جائیں گے۔ سمارٹ کارڈ ’شعائر‘ کی ریڈنگ کی جائے گی پھر انہیں بسوں سے مسجد الحرام پہنچایا جائے گا جہاں وہ طواف قدوم کریں گے جبکہ بسیں ان کا سامان لے کر خیمے کا رخ کریں گی۔

دوسرا طریقہ کار جو عازمین حج کمپنیوں کی بسوں سے استقبالیہ مرکز پہنچیں گے ان کی خیر مقدمی کارروائی مرکز میں ہوگی پھر انہیں مقررہ بسوں سے مسجد الحرام لے جایا جائے گا۔

تیسرا طریقہ کار، پرائیویٹ گاڑیوں سے انفرادی شکل میں آنے والے عازمین کے حوالے سے ہے۔ ان کا سامان کمپنی کے حوالے کیا جائے گا۔ انہیں مقررہ بسوں سے مسجد الحرام لے جایا جائے گا جہاں وہ طواف قدوم کریں گے۔ ان کا سامان متعلقہ کمپنی خیمے میں پہنچائے گی۔

رپورٹ کے مطابق ڈاکٹر مشاط نے بتایا تھا کہ مکہ مکرمہ سے حج کرنے والے طواف قدوم نہیں کریں گے وہ مقررہ وقت پر استقبالیہ مراکز پہنچیں گے جہاں سے انہیں ان کے سامان کے ساتھ منی پہنچا دیا جائے گا۔

استقبالیہ مراکز میں عازمین کے خیر مقدم کا آغاز 7 اور 8 ذی الحجہ کو ہوگا۔ اس حوالے سے تمام حجاج کو قافلوں کے سکیم پروگرام سے آگاہ کر دیا جائے گا ہر 20 حاجی پر ایک ہیلتھ کمانڈر تعینات ہوگا۔