میرپورخاص،باغی ٹی وی( نامہ نگار سید شاہزیب شاہ کی رپورٹ )روز مرہ استعمال کی اشیاء ضروریہ کی قیمتوں کو برقرار رکھنے کے لیے فعال کردار ادا کریں . ڈویژنل کمشنر میرپورخاص فیصل احمد عقیلی کی وڈیو لنک کے ذریعے تھرپارکر عمرکوٹ اور میرپورخاص کے ڈپٹی کمشنروں اور متعلقہ افسران کو ہدایت
تفصیلات کے مطابق ڈویژنل کمشنر میرپورخاص فیصل احمد عقیلی نے کہا ہے کہ روز مرہ اشیاء ضروریہ خورد و نوش کی مقررہ قیمتوں پر فروخت کو یقینی بنانے اور قیمتیں برقرار رکھنے کے لیے اپنے اپنے اضلاع میں فعال کردار ادا کریں تاکہ عوام کو ریلیف مل سکے . یہ ہدایت انہوں نے اپنے دفتر میں پرائس کنٹرول کمیٹی کے اجلاس کی صدارت کرتے ہوئے ڈپٹی کمشنروں کو دی .
انہوں نے مزید کہا کہ اشیاء خورد و نوش عوام کی بنیادی ضروریات میں شامل ہیں اس لئے عوام کو زیادہ سے زیادہ ریلیف فراہم کرنے کے لیے ضلع اور تحصیل سطح پر مارکیٹوں کے اچانک دورے کئے جائیں تاکہ بیوپاری ذخیرہ اندوزی اور منافع خوری نہ کر سکیں . انہوں نے بیورو آف سپلائی کے اسٹنٹ ڈائریکٹر کو ہدایت کی کہ وہ روزانہ کی بنیاد پر نرخنامہ جاری کرکے دکانداروں اور کاروباری حضرات کو پابند کریں کہ وہ نرخنامہ نمایاں جگہ پر آویزاں کریں تاکہ خریداروں کو قیمتوں کا معلوم ہو سکے .
اجلاس میں ریجنل ڈائریکٹر ایگریکلچر مارکیٹ شہزاد پنہور ، اسسٹنٹ ڈائریکٹر بیورو آف سپلائی اللہ جڑیو خاصخیلی ، اسٹنٹ ڈائریکٹر پلاننگ سلیم شیخ ،ڈائریکٹر اطلاعات میرپورخاص غلام رضا کھوسو اور متعلقہء افسران نے شرکت کی .
Leave a reply
