کیرالہ: سبزی بیچنے کیلئے 44 لاکھ بھارتی روپے سے زائد مالیت کی اوڈی گاڑی میں آنے والے کسان کی ویڈیو وائرل ہوگئی۔
باغی ٹی وی: بھارتی میڈیا کے مطابق بھارتی ریاست کیرالہ سے تعلق رکھنے والے کسان کے پاس لگژی اوڈی اے 4 ہے جس کی قیمت 44 لاکھ بھارتی روپے ہے کسان اپنی مہنگی ترین گاڑی میں بازار آتا ہے اور پھر اپنی سبزیاں بیچ کر واپس اسی گاڑی میں روانہ ہو جاتا ہے،اس حوالے سے کسان نے اپنی یہ ویڈیو سوشل ویب سائٹ انسٹاگرام پر بھی شیئر کی ہے-
کسان کی جانب سے شیئر کی گئی ویڈیو سوشل میڈیا پر وائرل ہو رہی ہے جس میں اسے کھیت سے پالک توڑتے دیکھا جا سکتا ہے، اور پھر کسان کو سفید رنگ کی اوڈی اے4 میں بیٹھ کر اسے ایک روڈ کنارے کپڑا بچھا کر پالک فروخت کرتے دیکھا جا سکتا ہے،کسان نے پالک کو کھیت سے توڑ کر ایک ٹرک میں رکھا اور پھر اسی ٹرک سے سبزی نکال کر فروخت کے لیے سڑک کنارے رکھی سوشل میڈیا صارفین کی جانب سے اس ویڈیو پر دلچسپ تبصرے بھی کیے جا رہے ہیں جبکہ کسان کو سراہا جا رہا ہے-
