اوکاڑہ: خاتون منشیات فروش گرفتار، 5 کلو 100 گرام چرس برآمد

اوکاڑہ،باغی ٹی وی(نامہ نگارملک ظفر) پولیس تھانہ منڈی احمد آباد کی کامیاب کارروائی میں خاتون منشیات فروش سونیا بی بی کو گرفتار کر لیا گیا۔ ملزمہ کے قبضے سے 5 کلو 100 گرام چرس برآمد ہوئی، جس کے خلاف امتناع منشیات ایکٹ کے تحت مقدمہ درج کر لیا گیا ہے۔

پولیس کے مطابق اطلاع ملنے پر مخبر کی نشاندہی پر کارروائی کی گئی۔ ملزمہ سونیا بی بی نہر کی پٹڑی پر مشتبہ حالت میں گلابی رنگ کے تھیلے کے ساتھ کھڑی تھی۔ پولیس نے بروقت کارروائی کرتے ہوئے خاتون کو قابو کر لیا۔ خاتون کے تھیلے کی تلاشی پر پانچ پیکٹ چرس برآمد ہوئی، جن کا مجموعی وزن 5100 گرام نکلا۔

ڈی پی او نے پولیس کی کارروائی کو سراہتے ہوئے کہا کہ منشیات فروشوں کے خلاف بلاامتیاز کارروائیاں جاری رہیں گی۔ انہوں نے عوام سے بھی اپیل کی کہ وہ منشیات کے خاتمے کے لیے پولیس کا ساتھ دیں تاکہ معاشرے کو نشے کی لعنت سے پاک کیا جا سکے۔

پولیس نے گرفتار ملزمہ کے خلاف مزید تفتیش شروع کر دی ہے اور منشیات کی ترسیل میں ملوث دیگر افراد کا سراغ لگانے کی کوششیں جاری ہیں۔