پاکستان کی طرف سے بابری مسجد کی جگہ رام مندر تعمیر کرنے کی پرزور مذمت
باغی ٹی وی : پاکستان نے بھارت میں تاریخی بابری مسجد کی جگہ رام مندر تعمیر کرنے کی پرزور مذمت کرتے ہوئے کہا ہے کہ بھارتی سپریم کورٹ نے غلط فیصلہ دیا۔
ترجمان دفتر خارجہ کی جانب سے جاری بیان میں کہا گیا ہے کہ بابری مسجد پانچ صدیاں قبل تعمیر کی گئی لیکن بھارتی سپریم کورٹ کے فیصلہ سے ظاہر ہوتا ہے کہ ہندوازم انصاف پر حاوی ہوا۔
عائشہ فاروقی کا کہنا تھا کہ فیصلہ سے یہ بھی ثابت ہوا کہ اکثریت کی سنی گئی۔ بھارت میں اقلیت خاص طور پر مسلمانوں کی عبادت گاہوں کو نشانہ بنایا جا رہا ہے۔ مسجد کی جگہ مندر کی تعمیر مستقبل میں بھارتی جمہوری چہرہ پر بدنما داغ کے طور پر رہے گا۔
انہوں نے پاکستان کے سیاسی نقشے سے متعلق بھارتی وزارت خارجہ کے بیان کو یکسر مسترد کرتے ہوئے کہا کہ بھارت پروپیگنڈے، جھوٹے اور بے بنیاد دعوؤں کے ذریعے گزشتہ سال پانچ اگست کو غیر قانونی زیر قبضہ جموں وکشمیر کی خصوصی آئینی حیثیت ختم کرنے کے اپنے غیر آئینی اقدام سے دنیا کو گمراہ نہیں کر سکتا۔
انہوں نے کہا کہ یہ امر نہایت افسوسناک ہے کہ توسیع پسندانہ عزائم اور ریاستی دہشت گردی کا بازار گرم رکھنے والا ملک دوسروں کو مورد الزام ٹھہرا رہا ہے۔ترجمان نے کہا کہ بھارت نے انیس سو سینتالیس سے جموں وکشمیر کے متعدد حصوں پر غیر قانونی قبضہ کر رکھا ہے اور کئی عشروں سے اقوام متحدہ کی سلامتی کونسل کی قراردادوں کی صریحاً خلاف ورزی کر رہا ہے۔
انہوں نے کہا کہ گزشتہ بہتر سال سے زائد عرصے سے بھارت اپنے وحشیانہ مظالم سے کشمیریوں کو اپنے سامنے جھکنے پر مجبور نہیں کر سکا۔ عائشہ فاروقی نے کہا کہ مسئلہ کشمیر پر پاکستان کا دوٹوک اور واضح موقف ہے۔ پاکستان کی جانب سے جاری کیا گیا سیاسی نقشہ اس کے پختہ عزم کا عکاس ہے.
واضح رہے کہ بھارتی میڈیا کے مطابق نریندر مودی آج رام مندر کی تعمیر کا سنگ بنیاد رکھ دیا. اس موقع پر سکیورٹی کے سخت انتظامات کئے گئے ہیں، بی جے پی حکومت نے پانچ اگست کو مقبوضہ کشمیر کی خصوصی حیثیت والی دفعات کو ختم کیا تھا، اس دن کو وہ اپنے لئے بہت اہم سمجھتی ہے اور رام مندر کا سنگ بنیاد رکھنے کیلئے جان بوجھ کر اس دن کا انتخاب کیا گیا ہے تاکہ کشمیریوں کے زخموں پر بھی نمک چھڑکا جاسکے،
میڈیا رپورٹس کے مطابق بھارت کی برسراقتدار پارٹی بی جے پی پانچ اگست کو جشن کے طور پر منا رہی ہے، ادھر کشمیریوں کی طرف سے دنیا بھر میں بھارتی ظلم و دہشت گردی اور لاک ڈاؤن کا ایک سال مکمل ہونے پر احتجاجی مظاہرے کئے جارہے ہیں، پاکستان میں اس دن کو یوم استحصال کشمیر کے طور پر منایا جارہا ہے اور شہر شہر مظاہرے کئے جارہے ہیں،
نریندر مودی بابری مسجد کی جگہ رام مندر کا سنگ بنیاد رکھنے کیلئے ایودھیا پہنچ گئے
