سلامتی کونسل اجلاس: پاکستان کو پھر خطاب کرنے سے روک دیا گیا
افغانستان کی صورتحال پر ہونے والے سلامتی کونسل کے اجلاس میں ایک بار پھر پاکستان کو خطاب کرنے سے روک دیا گیا پاکستان کے مستقل مندوب منیر اکرم کا کہنا ہے کہ بھارتی رویہ پاکستان کے موقف کی تصدیق کرتا ہے کہ ہندوستان سلامتی کونسل کا رکن بننے کا مستحق نہیں
باغی ٹی وی : تفصیلات کے مطابق چین کے نائب مندوب نے پاکستان کے معاملے کو اٹھایا اور اجلاس میں کہا کہ کچھ ممالک افغانستان کے ہمسایہ ممالک کا وسیع کردار دیکھناچاہتے ہیں لیکن کچھ ہمسایہ ممالک کی سلامتی کونسل اجلاس میں شرکت کی درخواست نہیں مانی گئی۔
سلامتی کونسل کے اجلاس کے بعد پاکستان کے مستقل مندوب منیر اکرم نے پریس بریفنگ کے دوران کہا کہ ہم نے سلامتی کونسل کے اجلاس میں شرکت کی درخواست دی تھی۔ انتہائی افسوسناک ہے کہ پاکستان کی درخواست کو ایک بار پھر بھارتی ایوان صدر نے روک دیا۔
انہوں نے کہا ہے کہ بھارت نے سلامتی کونسل کو ایک اہم نقطہ نظر سے آگاہ کرنے سے روکا ہمارا نقطہ نظر افغانستان اور خطے میں امن اور استحکام کی بحالی میں مددگار ثابت ہو سکتا ہےبھارت کے اس عمل سے افغانستان میں تنازعہ جاری رکھنے کے منصوبے کا اظہار ہوتا ہے۔
منیر اکرم نے کہا کہ بھارتی رویے کے باعث افغانستان سے پاکستان کے خلاف دہشت گردی کی سرپرستی جاری رکھنے خدشہ ہے۔
پاکستان کے مستقل مندوب منیر اکرم نے کہا ہے کہ بھارت کی جانبدارانہ اور رکاوٹ پر مبنی کارروائیاں پاکستان کے لیے اس کی نفرت کا اظہار ہے۔ سلامتی کونسل کے اجلاس میں افغانستان کی غیر فعال حکومت کے نمائندے کو خطاب کرنے دیا گیا-
منیر اکرم کا کہنا تھا کہ ہمیں بھارت کے پاکستان مخالف یکطرفہ رویے پر حیرانی نہیں، یہ اس بات کی دلیل ہے کہ بھارت سلامتی کونسل کی رکنیت کا اہل نہیں۔
