انٹرسروسزہاکی چیمپین شپ:دفاعی چیمپین پاکستان نیوی نے پاکستان ایئرفورس کو افتتاحی میچ میں4-2 گول سے شکست دیدی، ڈائریکٹر سپورٹس پی اے ایف سپورٹس کنٹرول کمیٹی گروپ کیپٹن احمد سعید قاضی افتتاحی میچ کے مہمان خصوصی تھے۔ نیوی کے کھلاڑی اکبر علی کی جانب سے دو شاندار فیلڈ گول سکور کئے گئے پاکستان ایئر فورس کی جانب سے محمد انیس کا شاندار کھیل
تفصیلات کے مطابق پاکستان ہاکی فیڈریشن کی زیرنگرانی پاکستان ایئر فورس کے زیراہتمام انٹرسروسز ہاکی چیمپین شپ کا افتتاح ہوگیا۔
افتتاحی میچ میں دفاعی چیمپین پاکستان نیوی نے پاکستان ایئر فورس کو ایک دلچسپ مقابلہ میں 4-2 گول سے شکست دیدی۔ افتاحی میچ کا آغاز تیز کھیل سے ہوا اور دونوں ٹیموں نے ایکدوسرے کے گول پوسٹ پر تابڑ توڑ حملے کئے۔ دفاعی چیمپین پاکستان نیوی کی جانب سے کھیل کے 9ویں منٹ میں محمد نعمان نے پینلٹی کارنر پر سکور کرکے اپنی ٹیم کو برتری دلادی۔ پی اے ایف ٹیم کی جانب سے جوابی طور پر کھیل کے 15ویں منٹ میں محمد انیس نے پینلٹی کارنر پر شاندار گول سکور کرکے نیوی کی برتری کا خاتمہ کردیا۔نیوی کی جانب سے کھیل کے 32ویں منٹ میں اکبر علی نے فیلڈ گول سکور کرکے اپنی ٹیم کو ایکبار پھر پرتری دلادی۔
کھیل کے 37ویں منٹ میں نیوی کے محمد صابر نے فیلڈ گول سکور کرکے نیوی کی برتری کو مستحکم بنا دیا۔44ویں منٹ میں پاکستان ایئر فورس کی جانب سے مشتاق نے پینلٹی کارنر پر گول کیا جبکہ کھیل کے 45ویں منٹ میں نیوی کی جانب سے اکبر علی نے فیلڈ گول سکور کرکے اہنی ٹیم کو فتح دلائی۔ اس میچ کو ایمپائرز حافظ عاطف ملک انٹرنیشنل اور یاسر خورشید انٹرنیشنل نے سپراوائز کیا جبکہ سبطین رضا نے ریزرو ایمپائر کی ذمہ داریاں سرانجام دی۔ رانا ساجد اور حمزہ طفیل نے بطور ججز اپنے فرائض نبھائے جبکہ علی عباس اس میچ کے ٹیکنیکل آفیسر تھے۔
انٹرسروسز میگا ایونٹ کو بہترین اور موثرانداز میں منعقد کرانے کے لئے پاکستان ہاکی فیڈریشن کی جانب سے کہنہ مشق ٹیکنیکل آفیشلز اور ایمپائرنگ پینل کو ایونٹ میں تعینات کیا گیا ہے۔ ایسوسی ایٹ سیکرٹری جنرل پی ایچ ایف سید ظاہر شاہ ٹورنامنٹ ڈائریکٹر جبکہ ایف آئی ایچ ایمپائرز مینجرسید ذوالفقار حیدر ایونٹ کے ایمپائرز مینجر کے فرائض سرانجام دے رہے ہیں۔
انٹرسروسز ہاکی چیمپین شپ کی افتتاحی تقریب کے مہمان خصوصی ڈائریکٹر سپورٹس پاکستان ایئر فورس گروپ کیپٹن احمد سعید قاضی تھے۔ معزز مہمان خصوصی کا سٹیڈیم آمد پر شایان شان استقبال کیا گیا اور انکو کھلاڑیوں اور آفیشلز سے متعارف کرایا گیا۔
ڈبل لیگ کی طرز پر کھلائے جانے والے اس ایونٹ میں مجموعی طور پر سات میچزکھیلے جائینگے
