وزیراعظم نے برآمدات میں کمی کا نوٹس لےلیا، کمیٹی تشکیل؛ 14 روز میں سفارشات طلب
وزیراعظم شہباز شریف نے ملکی برآمدات میں کمی کا نوٹس لیتے ہوئے تحقیقات کے لئے کمیٹی تشکیل دے دی۔ رواں مالی سال جولائی سے دسمبر تک ملکی برآمدات میں 5.79 فیصد کمی ہوئی، دسمبر میں سالانہ بنیادوں پر برآمدات میں 16.64 فیصد کی کمی ریکارڈ کی گئی، جب کہ دسمبر میں ماہانہ بنیادوں پر برآمدات 3.64 فیصد کم ہوئیں۔ وزیراعظم شہباز شریف نے ملکی برآمدات میں کمی کا نوٹس لیتے ہوئے وزیر تجارت نوید قمرکی سربراہی میں کمیٹی تشکیل دے دی ہے۔
کمیٹی میں گورنر اسٹیٹ بینک اور سیکرٹریز تجارت اور خزانہ شامل ہیں، جب کہ چیئرمین نشاط چونیاں گروپ شہزاد سلیم، سی ای او انٹر لوپ مصدق ذوالقرنین بھی کمیٹی کا حصہ ہوں گے۔ ذرائع کا کہنا ہے کہ وزیراعظم نے ملکی برآمدات میں اضافے کیلئے کمیٹی سے 14 روز میں سفارشات طلب کی ہیں۔ واضح رہے کہ گزشتہ روز جاری کی گئی رپورٹ جس کے مطابق ماہانہ بنیادوں پر گزشتہ ماہ دسمبر میں ملکی برآمدات میں چار فیصد کمی ہوئی جبکہ سالانہ بنیادوں پر گزشتہ ماہ برآمدات میں 17 فیصد کمی واقع ہوئی۔
دسمبر 2022 میں پاکستان نے 2.3ارب ڈالر کی برآمدات کیں۔ جبکہ گزشتہ ماہ دسمبر میں ماہانہ بنیادوں پر ملکی درآمدات میں 0.4فیصد کمی واقع ہوئی جبکہ سالانہ بنیادوں پر ملکی درآمدات میں 32فیصد کمی واقع ہوئی۔ اسی طرح ماہانہ بنیادوں پر ملک کے تجارتی خسارے میں دو فیصد اضافہ ہوا جبکہ سالانہ بنیادوں پر ملک کے تجارتی خسارے میں 41 فیصد کمی واقع ہوئی۔ دسمبر 2022 میں ملک کا تجارتی خسارہ منفی 2.9 ارب ڈالر رہا۔
