دنیا کی تاریخ جنگوں، فتوحات، شکستوں اور قربانیوں سے بھری پڑی ہے۔ ہر دور میں انسان نے اپنی طاقت منوانے، سرحدیں بڑھانے اور مفادات کے تحفظ کے لیے جنگوں کا راستہ اختیار کیا، لیکن تاریخ کا ایک تلخ سچ یہ بھی ہے کہ جنگ میں کوئی بھی فریق مکمل طور پر نہیں جیتتا۔ میدان میں کامیابی حاصل کرنے والی طاقتیں بھی انسانی جانوں کے ضیاع، معاشی تباہی، بکھرتے خاندانوں اور نسلوں تک باقی رہنے والے نفسیاتی زخموں سے محفوظ نہیں رہتیں۔
ہر سال 11 نومبر کو دنیا بھر میں Remembrance Day یعنی یومِ یادگار منایا جاتا ہے۔ یہ دن پہلی جنگِ عظیم میں 11 نومبر 1918ء کو ہونے والی جنگ بندی کی یاد دلاتا ہے۔ اس موقع پر جنگوں کے دوران جانیں قربان کرنے والے فوجیوں اور دیگر افراد کو خراجِ عقیدت پیش کیا جاتا ہے۔ یہ دن ہمیں یاد دلاتا ہے کہ امن کی قیمت کتنی بھاری ہوتی ہے اور جنگ کا نقصان صرف میدانِ جنگ تک محدود نہیں رہتا بلکہ گھروں، خاندانوں اور معاشروں تک پھیل جاتا ہے۔
پہلی جنگِ عظیم 1914ء میں شروع ہوئی اور 1918ء میں اختتام پذیر ہوئی۔ اس جنگ میں لاکھوں انسان اپنی جانوں سے ہاتھ دھو بیٹھے۔ بے شمار خاندان اپنے پیاروں سے محروم ہوئے، شہر تباہ ہوئے اور معیشتیں کمزور ہوئیں۔ اس کے بعد دوسری جنگِ عظیم نے انسانیت کو ایک مرتبہ پھر ایسی تباہی سے دوچار کیا جس کی مثال تاریخ میں کم ہی ملتی ہے۔ ہیروشیما اور ناگاساکی پر ایٹمی حملوں نے دنیا کو یہ احساس دلایا کہ جدید ہتھیاروں کی طاقت اگر انسانی شعور اور ذمہ داری سے خالی ہو جائے تو پوری نسلِ انسانی خطرے میں پڑ سکتی ہے۔
آج بھی دنیا کے مختلف خطوں میں جنگیں، مسلح تنازعات، انسانی حقوق کی خلاف ورزیاں اور بے گھر ہونے والے افراد کی مشکلات ہمارے سامنے ہیں۔ فلسطین ہو یا یوکرین، سوڈان ہو یا دیگر متاثرہ علاقے، سب سے زیادہ قیمت عام شہری ادا کرتے ہیں۔ بچے تعلیم سے محروم ہوتے ہیں، خواتین عدم تحفظ کا شکار ہوتی ہیں اور بزرگ بے بسی کی زندگی گزارنے پر مجبور ہو جاتے ہیں۔ سوال یہ ہے کہ کیا انسان نے تاریخ سے کوئی سبق سیکھا ہے؟
جنگوں کے خلاف بات کرنا کسی ملک کی دفاعی ضروریات یا اپنے وطن کے تحفظ کے حق سے انکار نہیں۔ ہر ریاست کو اپنی خودمختاری، سرحدوں اور شہریوں کے تحفظ کا حق حاصل ہے۔ تاہم دفاع اور جارحیت میں فرق کو سمجھنا ضروری ہے۔ قومی سلامتی کے ساتھ انسانی جانوں کا تحفظ، عالمی قوانین کی پاسداری اور سفارتی ذرائع سے تنازعات کا حل بھی اتنا ہی اہم ہے۔
پاکستان بھی ایک ایسا ملک ہے جس نے دہشت گردی، بدامنی اور علاقائی کشیدگی کے باعث بھاری انسانی اور معاشی نقصانات برداشت کیے ہیں۔ ہمارے سکیورٹی اداروں، افواج اور عام شہریوں نے امن و استحکام کے لیے قربانیاں دی ہیں۔ ان قربانیوں کو یاد رکھنے کے ساتھ یہ بھی ضروری ہے کہ معاشرے میں برداشت، اتحاد، بین المذاہب ہم آہنگی اور قانون کی بالادستی کو فروغ دیا جائے۔
میری نظر میں Remembrance Day صرف ماضی کے سپاہیوں کو یاد کرنے کا دن نہیں بلکہ زندہ انسانوں کے مستقبل کے بارے میں سوچنے کا موقع بھی ہے۔ اگر ہم واقعی شہداء اور جنگوں کے متاثرین کو خراجِ عقیدت پیش کرنا چاہتے ہیں تو ہمیں نفرت کے بجائے محبت، انتقام کے بجائے انصاف اور تصادم کے بجائے مکالمے کو فروغ دینا ہوگا۔
دنیا کو آج مزید ہتھیاروں سے زیادہ ذمہ دار قیادت، مضبوط سفارت کاری، انسانی ہمدردی اور انصاف کی ضرورت ہے۔ اقوام متحدہ سمیت عالمی اداروں کو بھی انسانی جانوں کے تحفظ اور تنازعات کے پرامن حل کے لیے مؤثر کردار ادا کرنا چاہیے۔
یاد رکھیے! جنگ میں فتح حاصل کرنے والا تاریخ میں فاتح کہلا سکتا ہے، لیکن حقیقی کامیابی اس میں ہے کہ انسانیت کو شکست سے بچایا جائے۔ کیونکہ امن کوئی کمزوری نہیں بلکہ ایک مضبوط، باشعور اور مہذب معاشرے کی پہچان ہے۔
مزید پڑھیں
