اپوزیشن جماعتیں حکومت کیخلاف نہیں بلکہ اپنے سیاہ اعمال پر یوم سیاہ منا رہی ہیں:عثمان بزدار
25جولائی 2018ء کو پاکستان کے سیاسی منظرنامے میں نئی تبدیلی آئی، عوام نے ووٹ کی طاقت سے کرپشن کے بتوں کو پاش پاش کیا
یوم سیاہ منانے والے عناصر نے ملک کا مستقبل سیاہ کیا،کرپشن کی سیاہی کے پیچھے چھپے چہرے بے نقاب ہو چکے ہیں
پنجاب حکومت کا بس اڈوں پر مسافروں کیلئے سہولتیں بہتر بنانے کا فیصلہ، وزیراعلیٰ نے ہدایات جاری کردیں
ویٹنگ ایریازمیں مسافروں کیلئے پنکھے، پینے کا پانی،لائٹس اورواش رومز جیسی سہولتیں ہر صورت میسر ہونی چاہئیں
ٹرانسپورٹ اونرزسے وضع کردہ ایس او پیز پر عملدر آمد کی پابندی کرائی جائے، کسی قسم کا دباؤ قبو ل نہ کیا جائے
بغیر فٹنس سر ٹیفکیٹ سڑکوں پر آنیوالی گاڑیوں کیخلاف کارروائی کا حکم،بارشی پانی کے نکاس کیلئے ایس او پیزپر عملدرآمد کی ہدایت
عارف والہ میں غیرمعیاری مشروب پینے سے بچیوں کے جاں بحق ہونے کے واقعہ کے ذمہ داروں کیخلاف کارروائی کا حکم
وزیراعلیٰ کا سابق ایم ڈی پنجاب کوریکولم اینڈ ٹیکسٹ بک بورڈ عبدالقیوم کے انتقال پر اظہار تعزیت
لاہور25 جولائی: وزیراعلیٰ پنجاب سردار عثمان بزدار نے کہا ہے کہ 25جولائی 2018ء کو پاکستان کے سیاسی منظرنامے میں خوشگوار نئی تبدیلی کی لہر آئی اور پاکستان کے باشعور عوام نے اپنے ووٹ سے نئی تاریخ رقم کی۔ عوام نے ووٹ کی طاقت سے کرپشن کے بتوں کو پاش پاش کیا۔ آج ایک بیان میں انہوں نے کہا کہ اپوزیشن جماعتیں حکومت کے خلاف نہیں بلکہ اپنے سیاہ اعمال پر یوم سیاہ منا رہی ہیں۔ نام نہاد یوم سیاہ منانے والے عناصر نے ملک کا مستقبل سیاہ کیا اور کرپشن کی سیاہی کے پیچھے چھپے چہرے بے نقاب ہو چکے ہیں اور اپوزیشن سیاستدان عوام میں اپنی رہی سہی ساکھ بھی گنوا بیٹھے ہیں۔ انہوں نے کہا کہ مخالفین ذہن نشین کر لیں کہ عوام نے انہیں 25جولائی2018کو بھی رد کیا اور آئندہ بھی کریں گے۔ مسترد شدہ عناصر کو صرف لوٹی ہوئی دولت بچانے کی فکر ہے۔اپوزیشن کا واویلا چور مچائے شور کے مترادف ہے۔ وزیراعلیٰ نے کہا کہ اللہ تعالی کے فضل وکرم سے 25 جولائی 2018 کو عوام کی جانب سے ملنے والے مینڈیٹ کی لاج رکھی ہے۔ پاکستان کے عوام با شعور ہیں،اپوزیشن کے جھانسے میں نہیں آئیں گے۔
بس اڈوں پر مسافروں کیلئے سہولتیں بہتر بنانے کا فیصلہ:پنجاب حکومت نے صوبے بھر میں بس اڈوں پر مسافروں کیلئے سہولتیں بہتر بنانے کا فیصلہ کیا ہے اوراس ضمن میں وزیراعلیٰ پنجاب سردار عثمان بزدارنے سیکرٹری ٹرانسپورٹ کو ہدایات جاری کرتے ہوئے کہا کہ بس اڈوں پر مسافروں کیلئے ضروری سہولتیں ترجیحی بنیادوں پرمہیا کی جائیں اوربس اڈوں میں صفائی کے انتظامات کو بہتر بنایاجائے۔
