تحریک انصاف آج منائے گی یوم تشکر

تحریک انصاف نے آج 25 جولائی کو یوم تشکر منانے کا اعلان کیا ہے تا ہم دوسری جانب اپوزیشن کو ایک سال بعد الیکشن میں مبینہ دھاندلی کا خیال آیا

باغی ٹی وی کی رپورٹ کے مطابق حکمران جماعت پی ٹی آئی آج یوم تشکر منائے گی اس ضمن میں ملک بھر میں‌ تقریبات کی جائیں گی. تحریک انصاف کے چیف آرگنائزر سیف اللہ خان نیازی نے تحریک انصاف کی صوبائی تنظیموں کو ہدایات کی ہیں کہ وہ آج 25 جولائی کو یوم تشکر منائیں. سیف اللہ خان نیازی کا کہنا تھا کہ تحریک انصاف انتخابات میں تاریخی فتح اور وزیر اعظم کے دورہ امریکہ کی کامیاب تکمیل پر رب العزت کا شکر ادا کریں گے..

واضح رہے کہ گزشتہ برس 25 جولائی کو پاکستان میں عام انتخابات ہوئے تھے جن کے نتیجے میں تحریک انصاف کی پاکستان میں حکومت بنی اور عمران خان پہلی بار وزیراعظم کی کرسی پر بیٹھے. اپوزیشن جماعتیں آج دھاندلی کا الزام لگا کر یوم سیاہ منا رہی ہیں. تا ہم تحریک انصاف یوم تشکر منائے گی.

وفاقی وزیر ہوا بازی غلام سرور خان نے بھی آج یوم تشکر منانے کا اعلان کیا ہے.

دوسری جانب تحریک انصاف کی رکن پنجاب اسمبلی مومنہ وحید نے 25 جولائی کو یوم تشکر منانے کے مطالبے کی قرارداد پنجاب اسمبلی میں جمع کرادی ۔ قرارداد میں کہا گیا ہے کہ پاکستان تحریک انصاف کی حکومت کا پہلا سال مکمل ہونے کے قریب ہے، عوامی طور پر مسترد کی گئی اپوزیشن جماعتوں نے 25 جولائی کا دن یوم سیاہ کے لئے منتخب کیا ہے جو جمہوریت سے حقیقی معنوں میں بغاوت کے مترادف ہے ۔ یہ ایوان یہ بھی سمجھتا ہے کہ یہ احتجاج سابق حکمرانوں کی سالہاسال کی کرپشن پر احتسابی عمل کو سبوتاژ کرنے کی کوشش ہے جس سے پاکستان کے عوام بخوبی آگاہ ہےں ۔ قرارداد کے مطابق یہ ایوان سمجھتا ہے کہ25 جولائی2018ء کو پاکستان میں تبدیلی کا سورج طلوع ہوا تھا اور قوم نے دیانتدار اور قوم و ملت سے مخلص عمران خان کو وزیر اعظم کے لئے منتخب کیا ۔ انہوں نے کہا کہ پاکستان تحریک انصاف کی25 جولائی2018ء کو عام انتخابات میں تاریخی فتح پر 25 جولائی یوم تشکر کے طور پر منایا جائے ۔ یہ ایوان اللہ تعالیٰ سے دعا گو ہے کہ پاکستان تحریک انصاف اور اپوزیشن جماعتوں کو پاکستان کی تعمیر و ترقی میں دیانتداری، ایمانداری اور خلوص سے کام کرنے کی توفیق عطا فرما ۔