سکالر شپ میں بڑی کٹوتی ، حکومت اپنے وعدوں سے منحرف ہونے لگی

لاہور: تبدیلی والی سرکاراپنے ہی وعدوں سے پیچھے ہٹنے لگی ، سکالر شپ میں‌اضافہ کرنے کی بجائے کٹوتی کرنے لگی ، اطلاعات کے مطابق عالمی شہرت یافتہ جامعات سے پی ایچ ڈی کرنے کے لیے سکالر شپ پروگرام میں کٹوتی کردی ہے ، فارن پی ایچ ڈی سکالر شپ کی تعداد 35 سے کم کرکے 5 کردی گئی۔

پنجاب حکومت ذرائع کے مطابق پنجاب ایجوکیشنل اینڈومنٹ فنڈز میں کٹوتی سے فارن پی ایچ ڈی پروگرام کو بڑے پیمانے پر نقصان پہنچایا گیا ہے . پنجاب ایجوکیشنل اینڈاؤمنٹ فنڈز نے پنجاب کے پی ایچ ڈی سکالر شپ 28 سے کم کر کے صرف 3 کر دیئے ہیں۔

ذرائع کے مطابق رواں سال پیف کی جانب سے دیگر صوبوں سے صرف دو طلباء کو پی ایچ ڈی سکالر شپ ملیں گی۔ عالمی جامعات میں پی ایچ ڈی میں داخلہ لینے پر فیس کی ادائیگی اور 1200 ڈالرز ماہانہ وظیفہ دیا جاتا ہے۔

یادرہے کہ سابق صدر جنرل پرویز مشرف کے دور میں‌ہی انٹرنیشنل پی ایچ ڈی سکالر شپ پروگرام کا اجراء ہوگیا تھا جس کا بنیادی مقصد غیر ملکی پی ایچ ڈی تعداد میں اضافہ کرنا اور جامعات میں پی ایچ ڈی فیکلٹی کو بڑھانا تھا۔