لاہور:پنجاب پولیس کا پرویزالٰہی کے بیان پر ردعمل،اطلاعات کے مطابق پنجاب پولیس نے اسپیکر پنجاب اسمبلی چوہدری پرویز الٰہی کے شہید کانسٹیبل سے متعلق بیان پر شدید ردعمل کا اظہار کیا ہے۔
ڈی ایس پی سی آئی اے اقبال ٹاون محمد علی بٹ کہتے ہیں کہ چوہدری پرویز الٰہی نے جو بیان احمد کمال کے حوالے سے دیا ہے وہ تکلیف دہ ہے ، ان کا کہناتھا کہ چوہدری پرویز الہی کی سیکورٹی بھی تو یہی پولیس کرتی ہے انہوں نے کون سا ایٹم بم چلایا ہے کہ ان کوسیکورٹی کی ضرورت ہے پھربھی پولیس ذمہ داری نبھاتی ہے ،
ان کا کہنا تھا کہ جب تک چوہدری پرویز الٰہی پولیس اور احمد کمال کے خاندان سے معافی نہیں مانگتے ان کو سیکورٹی نہیں دی جائے گی
اس سے قبل پنجاب پولیس کے ترجمان نے پرویز الٰہی کے بیان کا ویڈیو کلپ لگاتے ہوئے کہا کہ پولیس کے جوان دن رات فرائض کی انجام دہی میں قربانیاں دیتے ہیں اور اپنے کم سن بچوں اور اہلِ خانہ کو چھوڑ کر جامِ شہادت نوش کرتے ہیں۔
انہوں نے کہا کہ شہید کے 5 کم سن بچوں کے سر پر شفقت کا ہاتھ رکھنے کے بجائے ان کی توہین اور شہید کو شہید ماننے سے ہی انکار کسی طور پر مناسب نہیں ہے۔
واضح رہے کہ میڈیا سے گفتگو کے دوران صحافی نے سوال کیا کہ کل رات ایک پولیس اہلکار شہید ہو گیا؟ اس پر پرویز الٰہی نے کہا کہ کس بات کا شہید؟ کیا ڈاکو پکڑنے گئے تھے؟ کسی کوکیاپتہ اس کےگھرآنے والاچور ہے یاڈاکو،کون ہے ؟
یاد رہے کہ لاہور میں فائرنگ سے ہلاک ہونے والے پولیس کانسٹیبل کے متعلق پرویز الٰہی کا کہنا تھاکہ گھرمیں بہن، بیٹی،بہو اوربیوی ہو تو کوئی دروازہ توڑکرآجائےتو وہ کیا سمجھے گا؟ وہ یہی سمجھےگاکہ ڈاکوآگئے، ڈاکوؤں کے ساتھ جو سلوک ہوتاہےوہ ہوااس کےساتھ۔
خیال رہے کہ گزشتہ شب لاہور میں ماڈل ٹاؤن میں پولیس کے چھاپے کے دوران پی ٹی آئی کارکن کی فائرنگ سے کانسٹیبل کمال احمد شہید ہوگئے تھے۔
Leave a reply
