18 ویں انٹرنیشنل چولستان ڈیزرٹ ریلی کے شیڈول کا اعلان

18 ویں انٹرنیشنل چولستان ڈیزرٹ ریلی کے شیڈول کا اعلان

نگران صوبائی وزیر اطلاعات و ثقافت عامر میر نے سیکرٹری انفارمیشن علی نواز ملک، سیکرٹری سیاحت احسان بھٹہ، کمشنر بہاولپور راجہ جہانگیر انور اور ایم ڈی ٹی ڈی سی پی آغا عباس کے ہمراہ ڈی جی پی آر آفس میں انٹرنیشنل ڈیزرٹ ریلی کے انعقاد سے متعلق پریس کانفرنس کرتے ہوئے کہا کہ محکمہ سیاحت پنجاب کے زیر اہتمام 18 ویں انٹرنیشنل چولستان ڈیزرٹ ریلی کا انعقاد 07 سے 12 فروری 2023کو چولستان صحرا میں قلعہ دراوڑ میں ہو گا۔ ریلی کا فاصلہ 500کلو میٹر پر محیط ہو گا جس میں 150سے زیادہ تجربہ کار پروفیشنل ڈرائیورز ریلی میں اپنی مہارت آزمائیں گے۔

عامر میر نے کہا کہ ریلی کی نو کیٹگریز ہوں گی جن میں سے آٹھ سٹاک،پریپیڈ گاڑیوں کی جبکہ نویں کیٹگری خواتین کی ہو گی۔ ریلی کی کل انعامی رقم 50لاکھ روپے سے زیادہ ہو گی جو کہ نو کیٹگریز میں جیتنے والوں میں تقسیم ہو گی۔ انہوں نے کہا کہ پاکستان کی خواتین ڈرائیورز اور بین الاقوامی ڈرائیورز بھی ریلی کا حصہ ہوں گے جبکہ بہاولپور، بہاولنگر اور رحیم یار خان کے اضلاع ریلی کے روٹ میں شامل ہوں گے۔ انہوں نے کہا کہ ریلی کے علاوہ کلچر نائٹ، آتش بازی، ٹینٹ ویلج، اونٹ ریس، کبڈی اور نیزہ بازی کے مقابلے بھی منعقد کئے جائیں گے جبکہ چولستان ڈیزرٹ ریلی میں پیرا گلائیڈرز کی ٹیم بھی حصہ لے گی۔

 معروف اداکار فیروز خان نے پندرہویں چولستان جیپ ریلی میں شرکت کی

16ویں چولستان ڈیزرٹ جیپ ریلی، کون رہا فاتح

 پنجاب میں سیاحت کے فروغ کے لئے عملی طور پر کام کر رہے ہیں

انہوں نے کہا کہ ریلی سے قلعہ دراوڑ اور چولستان میں ترقی کی راہیں کھلیں گی۔ سیکرٹری سیاحت نے کہا کہ ریلی کے انعقاد کا بنیادی مقصد قلعہ دراوڑ اور چولستان کے رہن سہن کو سیاحوں کی نظروں میں اجاگر کرنا ہے۔ ریلی سے جنوبی پنجاب کو موسم سرما کے ریزارٹ کے طور پر سیاحوں میں متعارف کروایا جائے گا۔ انہوں نے کہا انٹر نیشنل ڈیزرٹ ریلی پاکستان کا سب سے بڑا موٹر سپورٹس ایونٹ بن چکا ہے۔ کمشنر بہاولپور ڈویژن راجہ جہانگیر انور نے کہا کہ آرمی، رینجرز اور پولیس سکیورٹی فراہم کریں گے جبکہ تمام متعلقہ محکموں جن میں ریسکیو1122، محکمہ صحت، پولیس اور ضلعی انتظامیہ کو ہدایات جاری کر دی گئی ہیں۔انہوں نے کہا کہ تقریباً 5 لاکھ لوگ ریلی دیکھنے آئیں گے جبکہ 3 ہزار سے زیادہ پولیس فورس سکیورٹی فراہم کرے گی۔