راولپنڈی:نامعلوم افراد کی فائرنگ سےایس ایچ او شہید:والد گرامی بھی شہید ہوئے مگرکہاں؟اہم خبرآگئی

راولپنڈی:نامعلوم افراد کی فائرنگ سے ایس ایچ او شہید ،اطلاعات کے مطابق راولپنڈی میں کچہری کے قریب نامعلوم افراد کی فائرنگ سے ایس ایچ او تھانہ ریس کورس میاں عمران شہید ہوگئے۔

ذرائع کے مطابق ایس ایچ او تھانہ ریس کورس میاں عمران اپنے گھر سے گاڑی میں نکلے تھے کہ موٹر سائیکل سوار ملزمان نے انہیں فائرنگ کرکے شہید کردیا۔

پولیس کا کہنا ہے کہ موٹر سائیکل سوار ملزمان ایس ایچ او پر فائرنگ کرکے فرار ہوگئے۔پولیس کے مطابق شہید ایس ایچ او میاں عمران کی لاش کو ضابطے کی کارروائی کے لیے اسپتال منتقل کردیا گیا ہے۔

ذرائع کے مطابق آر پی او راولپنڈی اور ڈی پی او راولپنڈی جائے وقوعہ پر پہنچ گئے، پولیس کا کہنا ہے کہ جائے وقوعہ سے شواہد اکٹھے کیے جارہے ہیں۔

واضح رہے کہ شہید ایس ایچ او میاں عمران کے والد بھی پولیس مقابلے کے دوران شرپسند عناصر کی فائرنگ سے شہید ہوگئے تھے۔ذرائع کے مطابق شہید ایس ایچ او میاں عمران نے بھی شرپسند عناصر کے خلاف کارروائی کی تھی اور انہیں دہشت گردوں کی جانب سے دھمکیاں دی گئی تھیں