بالی ووڈ سپر اسٹار سلمان خان نے سوشل میڈیا پر مدد مانگنے والے جنوبی بھارتی ریاست کرناٹکا کے ایک اٹھارہ سالہ طالب علم کی مدد کی-
باغی ٹی وی : بھارت میں کئی فلمی شخصیات کورونا وائرس کی دوسری لہر سے متاثر ہونے والوں کی مدد کے لیے آگے آئی ہیں جس میں سلمان خان بھی پیش پیش ہیں-
سلمان خان نے طالبعلم کے والد کی کورونا وائرس سے موت کے بعد مالی مدد کی اور اس سلسلے میں اسے راشن فراہم کرنے کے ساتھ ساتھ تعلیم آلات بھی فراہم کیے۔
گزشتہ برس بھی سلمان خان نے ان افراد کی مدد کی تھی جو کہ کورونا وائرس کی عالمی وبا کے بعد لگائے گئے لاک ڈائون کی وجہ سے متاثر ہوئے تھے۔
فیڈریشن آف ویسٹرن انڈیا سائن ایمپلائز کے صدر بی این تیواڑی کے مطابق سلمان خان نے گزشتہ برس پچیس ہزار ڈیلی ویجز ورکرز کی اپنے فائونڈیشن کے ذریعے مالی امداد کی تھی۔
بھارتی میڈیا کے مطابق کرناٹکا سے تعلق رکھنے والے طالب علم نے سوشل میڈیا پر اپنے والد کی کورونا سے موت کے بعد مالی امداد کے لیے کہا تھا۔
واضح رہے کہ سلمان خان اس وقت بھارت میں کورونا کی دوسری لہر کے دوران فرنٹ لائن ورکرز اور دیگر متاثرین کی دل کھول کر مدد کررہے ہیں گزشتہ دنوں فرنٹ لائن ورکرز کیلئے بھجوائے جانے والے کھانے کا معیار بھی سلمان خان نے خود چیک کیا تھا۔
علاوہ ازیں سلمان خان کی پروڈکشن کمپنی اور زی انٹرٹینمنٹ نے مل کر کورونا متاثرین کی مدد کا اعلان کیا ہے سلمان خان کی فلم زی کے علاوہ دیگر پلیٹ فارمز پر بھی ریلیز کی جائے گی جس کی آمدنی کو کورونا متاثرین کی مدد اور طبی آلات کی فراہمی میں استعمال کیا جائے گا زی انٹرٹینمنٹ بھی بھارتی ریاست مہاراشٹرا میں کورونا ریلیف کا کام کررہی ہے۔
