سکریٹری ہاؤسنگ و اربن ڈویلپمنٹ جنوبی پنجاب لیاقت علی چٹھہ نے کہا کہ وزیر اعلی پنجاب سردار عثمان احمد خان بزدار کی ہدایت پر ترقیاتی منصوبوں کی بروقت تکمیل اولین ترجیح ہوگی،مٹریل کے معیاری پر ہرگز سمجھوتہ نہیں کیا جائیگا۔فنڈز ہونے کے باوجود منصوبوں کی تکمیل میں تاخیری حربے استعمال کرنے والی تعمیراتی کمپنیوں کو سرکاری منصوبوں کےلئے بلیک لسٹ کردیا جائیگا۔
انہوں نے یہ بات کمشنر آفس ڈیرہ غازی خان میں پبلک ہیلتھ،پارکس اینڈ ہارٹیکلچر اتھارٹی اور دیگر محکموں کے منصوبوں کی بریفنگ کے دوران کہی۔کمشنر ڈیرہ غازی خان ڈویژن ڈاکٹر ارشاد احمد،ڈپٹی کمشنر کیپٹن ریٹائرڈ محمد علی اعجاز اور دیگر محکموں کے افسران موجود تھے۔سکریٹری ہاؤسنگ لیاقت علی چٹھہ نے کہا کہ ڈیرہ غازی خان میں آئندہ سال جانے والی سکیموں کی تعمیراتی کمپنیوں کو تحریری طور پر پابند کیا جائے کہ وہ تعمیراتی کام میں تعطل نہیں لائیں گے۔سٹریٹ لائٹس کےلئے بنائی گئی ناقص بنیادیں از سر نو تعمیر کی جائیں۔
ناقص مٹریل ہرگز برداشت نہیں ہوگا۔محکمے بارش کے بعد سکیموں کا از سرنو جائزہ لیں، بیٹھ جانے والی ٹف ٹائلز اور دیگر کام بحال کیا جائے۔مکمل ہونے والی واٹر سپلائی سکیموں کو کمیونٹی کے ہینڈ اوور کی جائیں۔ڈیرہ غازی خان اور تونسہ شہر میں مکمل ہونے والے پارکس،چوک،گرین بیلٹس اور دیگر کام متعلقہ محکمے کو ہینڈ اوور نہ ہونے تک پی ایچ اے لاہور دیکھ بھال کرنے کا پابند ہوگا۔ اجلاس میں دیگر امور کا جائزہ لیتے ہوئے ہدایات جاری کی گئیں۔
