سینیٹر (ر) جاوید جبار کی ڈاکومینٹری "Separation Of East Pakistan The Untold Story” تحریر: محمد عبداللہ

گزشتہ شب پیکجز مال لاہور میں سابقہ وزیراطلاعات و ریٹائرڈ سینیٹر جاوید جبار کی مشرقی پاکستان کی علیحدگی پر ڈاکومینٹری "Separation Of East Pakistan The Untold Story” کی سکریننگ تھی. ڈامینٹری میں جاوید جبار، شرمیلا بوس، مجیب شامی، ڈاکٹر عائشہ جلال و دیگر ماہرین کی مشرقی پاکستان کی علیحدگی کے اسباب و واقعات پر حقائق سے مزین مفصل گفتگو تھی.
مشرقی پاکستان کی وجوہات کے نام پر ہونے والے پراپیگنڈوں، مشرقی پاکستان کی علیحدگی میں افواج پاکستان کے کردار، ایوب خان کے مارشل لا اور بعد ازاں جنرل یحیٰ کے دور کی غلطیوں، سیاستدانوں بالخصوص شیخ مجیب، مسٹر زیڈ اے بھٹو و دیگر کے کردار، مشرقی پاکستان کے لوگوں کی محرومیوں پر مفصل گفتگو تھی.
مشرقی پاکستان کی علیحدگی کے موقع پر مکتی باہنی، بھارتی افواج، بھارتی میڈیا، بھارتی سیاستدانوں کے کردار پر بھی کھل کر بات کی گئی اور حقائق سے واضح کیا گیا کہ یہ پلاٹ کس کا تھا اور کس نے اس میں کیا کردار ادا کیا.
بھارتی میڈیا اور سیاستدانوں کے افواج پاکستان کے بارے میں جھوٹے پراپیگنڈوں مثال کے طور پر سانحہ مشرقی پاکستان میں کل کتنے لوگ تہ تیغ ہوئے اور ان کو قتل کرنے والی پاکستانی فوج تھی یا کوئی اور… سانحہ مشرقی کے وقت خواتین کی آبروریزی کے واقعات کی تعداد، ریپ کن کا ہوا اور کن مجرمان نے کیا، مشرقی پاکستان میں پاکستان کی مسلح افواج کی تعداد کتنی تھی، شہید کتنے ہوئے اور بھارتی قید میں جانے والے فوجیوں کی تعداد کتنی تھی… ان سبھی پراپیگنڈوں پر کھل کر بات ہوئی.
ڈاکومینٹری کے آخر پر جو سابقہ مشرقی پاکستان (موجودہ بنگلہ دیش) اور مغربی پاکستان (موجودہ پاکستان) کے لوگوں سے کی جانے والی استدعا اور میسج بھی اچھا اور مناسب تھا اور ریاست پاکستان کی بنگلہ دیش بارے آئندہ پالیسیوں کا مظہر تھا.
سولہ دسمبر 2021 کو اس ڈاکومینٹری کو یوٹیوب اور دیگر سوشل میڈیا پلیٹ فارمز پر اپلوڈ کردیا جائے گا. یقیناً ایک اچھی کاوش ہے جو جاوید جبار اور ان کی ٹیم کی محنتوں کا ثمر ہے. احباب لازمی اس کو دیکھیں.