شہباز شریف نواز شریف کیلئے کیسا کردار ادا کر رہے ہیں؟ حافظ حسین احمد کا نیا انکشاف

شہباز شریف نواز شریف کیلئے کیسا کردار ادا کر رہے ہیں؟ حافظ حسین احمد کا نیا انکشاف
باغی ٹی وی کی رپورٹ کے مطابق جمعیت علماء اسلام ف کے رہنما حافظ حسین احمد نے کہا ہے کہ شہاز شریف اپنے بھائی کے لئے برادر یوسف کا کردار ادا نہ کریں

حافظ حسین احمد نے میڈیا سے گفتگو کرتے ہوئے کہا کہ عمران خان کی کابینہ میں پرویز مشرف اور پیپلز پارٹی کی اکثریت ہے جبکہ منتخب کے بجائے غیر منتخب وزراء اور مشیروں کی فوج بھرتی کی گئی ہے، عمران خان نے اپنی روایت کو برقرار رکھتے ہوئے مختصر کابینہ رکھنے کے بیان پر یوٹرن لیا اور 50سے زائد کی کابینہ تشکیل دیدی ہے وزراء اور مشیروں کی تعداد میں اضافے سے کارکردگی پر کوئی اثر نہیں پڑ رہا، نااہلوں کی ٹیم نے نصف سنچری تو مکمل کرلی ہے مگر ان کی کارکردگی صفر ہے۔

حافظ حسین احمد کا کہنا تھا کہ میاں شہباز شریف اپوزیشن لیڈر ہیں اس لیے انہیں اپوزیشن کا رول ادا کرنا چاہئے، وہ اپوزیشن جماعتوں کو ساتھ لیکر چلیں،میاں برادران کو اب ایک پیج پر آنا ہوگا، شہباز شریف اپنے بڑے بھائی میاں نواز شریف کے لیے "برادرِ یوسف” نہ بنیں اور مسلم لیگ ن کے اصل نعرے ”ووٹ کو عزت دو“ کی پیروی کریں۔

حافظ حسین احمد کا ایک سوال کے جواب میں کہنا تھا کہ تحریک انصاف سندھ میں گورنر راج نافذ کرنے اور 18ویں ترمیم میں چھیڑ چھاڑ کی باتیں کررہی ہے، اگر ایساکوئی بھی غیر آئینی اقدام کیا گیا تو یہ نیک شگون نہیں ہوگا اور ملک میں افراتفری پیدا ہوگی۔