واقعی بددیانت اورکرپٹ ہے :شیخ رشید سابق وزیراعظم کے خلاف گواہ بن گئے

اسلام آباد:شاہد خاقان واقعی بددیانت اورکرپٹ شخص ہے،شیخ رشید سابق وزیراعظم کے خلاف گواہ بن گئے اطلاعات کے مطابق وفاقی وزیر ریلوے شیخ رشید احمد سابق وزیر اعظم شاہد خاقان عباسی کے خلاف نیب کے گواہ بن گئے ہیں۔

تفصیلات کے مطابق ایل این جی اسکینڈل کیس میں اہم پیش رفت سامنے آئی ہے، شیخ رشید احتساب عدالت میں ایل این جی کیس میں مسلم لیگ ن کے رہنما شاہد خاقان عباسی کے خلاف گواہی دیں گے، اس کیس میں نیب مجموعی طور پر 59 گواہان عدالت میں پیش کرے گا۔

ذرائع کے مطابق وزیر ریلوے شیخ رشید بہ طور شکایت کنندہ نیب کے پہلے گواہ ہوں گے، وزارت توانائی کے 4 افسران حسن بھٹی، نواز احمد ورک، عبدالرشید جوکھیو اور عمر سعید بھی گواہان میں شامل ہیں۔دیگرگواہان میں قائم مقام جی ایم سوئی سدرن گیس فصیح الدین بھی گواہان میں شامل ہیں جبکہ جمیل اجمل ڈائریکٹر پورٹ قاسم اتھارٹی بھی استغاثہ کے گواہ ہوں گے۔

شیخ رشیداحمد کئی بار سا بق وزیراعظم شاہد خاقان عباسی پر کرپشن کے الزامات اور مناظرے کا چیلنج دے چکے ہیں۔سابق وزیراعظم شاہد خاقان عباسی پر بطور وزیرِ پیٹرولیم ایل این جی ٹرمینل کا ٹھیکہ مبینہ طور پر من پسند کمپنی کو دينے کا الزام ہے۔اس کے علاوہ نیب کے مطابق ٹھیکے سے قومی خزانے کو مبینہ طور پر اربوں روپے کا نقصان پہنچا۔