سیالکوٹ (باغی ٹی وی،نامہ نگار ) وزیر اعلیٰ پنجاب مریم نواز کی ہدایت پر ڈی پی او سیالکوٹ رانا عمر فاروق نے تھانہ بڈیانہ میں کھلی کچہری کا انعقاد کیا۔ کچہری میں ڈی پی او نے شہریوں کے مسائل سنے اور متعلقہ افسران کو ہدایت کی کہ تمام معاملات کی شفاف اور میرٹ پر تفتیش کی جائے۔
کھلی کچہری کے دوران ڈی پی او نے خاص طور پر زمین کے تنازعات سے متعلق کئی دنوں سے زیرِ التوا مقدمات کو فوری نمٹانے کا حکم جاری کیا۔ انہوں نے پولیس کو ہدایت دی کہ جرائم پیشہ عناصر کے خلاف کارروائیاں تیز کی جائیں اور جودھالہ میں دفعہ 324 کے مقدمات میں ملوث ملزمان کو جلد گرفتار کیا جائے۔
ڈی پی او رانا عمر فاروق نے کہا کہ علاقے میں خوف و ہراس پھیلانے والے عناصر کے خلاف سخت ایکشن لیا جائے گا اور انہیں ہرگز معاف نہیں کیا جائے گا۔ انہوں نے مزید کہا کہ پسرور اور بڈیانہ میں ٹریفک کے مسائل کے حل کے لیے اضافی نفری اور پنجاب پولیس کی یوسی فورس تعینات کی جائے گی۔
کھلی کچہری میں ایس ایچ او تھانہ بڈیانہ، ایس ایچ او سٹی، ایس ایچ او تھانہ صدر، اور ایس ایچ او تھانہ قلعہ کالر والا نے بھی شرکت کی۔ اس موقع پر ڈی پی او نے کہا کہ کھلی کچہریوں کا مقصد عوام کو ان کے مسائل کا فوری اور موثر حل فراہم کرنا ہے تاکہ انصاف ان کی دہلیز پر پہنچایا جا سکے۔
سیالکوٹ پولیس عوام کی خدمت اور تحفظ کے لیے دن رات سرگرم عمل ہے اور شہریوں کی شکایات کا ترجیحی بنیادوں پر ازالہ کیا جائے گا۔
