سیالکوٹ،باغی ٹی وی( بیوروچیف شاہد ریاض سے) سیکرٹری ہیلتھ پنجاب علی جان خان نے کہا ہے کہ علامہ اقبال میموریل ٹیچنگ ہسپتال سیالکوٹ کی ری ویمپنگ کا منصوبہ 15جون تک مکمل کرلیا جائے، جاری منصوبے کا 75 فیصد تعمیرات کام مکمل ہوچکا ہے جس پر 51 کروڑ 70 لاکھ روپے لاگت آئی ہے جبکہ منصوبے کی مجموعی تخمینہ لاگت 80 کروڑ روپے لگایا گیا ہے۔
400 بستروں پر مشتمل ہسپتال کی پرانی عمارت کے ایڈمن آفیسر، او پی ڈیز، وارڈز، فارمیسی، لیبارٹریز، گذرگاہوں اور واش روم میں از سر نو ٹائلز لگائی گئی ہیں، تمام پرانی وائرنگ کو تبدیل کردیا گیا ہے اور چھتوں کی سیلنگ کے علاوہ دیگر بنیادی سہولیات کو امپروو کیا گیاہے۔
سیکرٹری ہیلتھ پنجاب علی جان خان نے کہا ہے کہ صوبے کے پرانے ہسپتالوں کی ایک ہی طرز پر ری ویمپنگ کی جارہی ہے اور یونیفارم ٹائلز، لائٹس اور دیگر آلات و سامان کی تنصیب کی جارہی ہے جس کا مقصد کوالٹی کو یقینی بنانا ہے۔
انہوں نے اس موقع پر موجود بلڈنگ ڈیپارٹمنٹ کے مقامی حکام کو ہدایت کی کہ وہ کام کی رفتار کو بڑھائیں اور مقررہ ٹائم لائن سے قبل ہی منصوبہ مکمل کرکے ہسپتال انتظامیہ کے سپرد کیا جائے تاکہ بلاتاخیر ہسپتال میں فل کپیسٹی پر طبی سہولیات کی فراہمی کی سرگرمیوں کو بحال کیا جاسکے۔
ڈپٹی کمشنر محمد ذوالقرنین نے بتایا کہ ہسپتال کی ری ویمپنگ کے منصوبے پر کام کا روزانہ کی بنیاد پر جائزہ لیا جاتا ہے۔ ایم ایس ڈاکٹر رانا الیاس، ایس ڈی او بلڈنگ چودھری اعجاز اور وائس پرنسپل خواجہ محمد صفدر میڈیکل کالج ڈاکٹر عبد الستار بھی موجود تھے۔
Leave a reply
