مین بازار کو کشادہ کرنے کا فیصلہ

شیخوپورہ (نمائندہ باغی ٹی وی ) شیخوپورہ میں ٹریفک کا نظام بہتر بنانے اور تجاوزات کی بھر مار کو ختم کرنے کے لیے مین بازار شیخوپورہ میں 3 درجن میونسپل کارپوریشن کی دوکانوں کو ختم کر کے ان کے الاٹیوں کو متبادل پلاٹ دوکانوں کی تعمیر کے لیے دینے پر غور کیا جا رہا ہے محکمہ مال کے باخبر ذرائع نے بتایا ہے کہ یہ دوکانیں مقامی لوگوں کے ذاتی مکانات کے آگے نالے پر بنی ہوئی ہیں جن کی وجہ سے مین بازار کا 60 تا 70 فیصد حصہ تجاوزات کی زد میں آچکا ہے جس کے باعث روزانہ مین بازار میں بیسیوں مرتبہ ٹریفک بلاک ہوتی ہے اور شہریوں اور بالخصوص خواتین کو انتہائی مشکلات کا سامنا کرنا پڑتا ہے پہلے مین بازار میں آسانی سے ٹرک گزر جاتا تھا مگر اب وہاں سے موٹر سائیکل گزرنا بھی محال ہوگیا ہے ان ذرائع نے بتایا ہے کہ سڑک کی اراضی صوبائی حکومت کی ملکیت ہے مگر اس کا کرایہ میونسپل کارپوریشن اکٹھا کر رہی ہے اور عوام کو انتہائی اذیت کا سامنا کرنا پڑ رہا ہے ان دوکانوں کے موجودہ الاٹیوں کو تہہ بازاری کی پرچی جاری کی گئی تھی مگر انہوں نے یہاں پر پختہ تعمیرات کر لیں جس کی وجہ سے مین بازار کا بڑا نالہ بھی آئے روز بند ہونے سے علاقہ میں تعفن پھیل جاتا ہے ان ذرائع نے بتایا ہے کہ اگر مین بازار میں سرکاری اراضی پر بننے والی دوکانوں کو ختم کرنے کی تجویز اعلیٰ سطح پر منظور ہوگئی تو موجودہ الاٹیوں کو کاروبار کرنے کے لیے متبادل زمینیں دی جائیں گی اور مین بازار کی سڑک کو کشادہ کر کے اس کے درمیان ڈیوائیڈر بھی لگایا جائے گا اور اس پر مال روڈ لاہور کی طرح خوبصورت لائٹیں بھی لگائی جائیں گی یہ امر قابل ذکر ہے کہ ماضی میں بھی مین بازار کو کشادہ کرنے کی کئی بار کوششیں کی گئیں مگر روایتی ملی بھگت کے باعث یہ کوششیں بارآور ثابت نہ ہوسکی