تربت: ایئر پورٹ روڈ پر فٹبال سٹیڈیم کے قریب دھماکا، متعدد زخمی

تربت:بلوچستان کے ضلع تربت میں ایئر پورٹ روڈ پر دھماکا ہوا جس میں متعدد افراد زخمی ہو گئے ہیں۔ پولیس کے مطابق تربت میں ایئر پورٹ روڈ پر فٹبال سٹیڈیم کے قریب دھماکا ہوا ہے، دھماکے کے بعد شدید فائرنگ کی گئی، امدادی ٹیموں کو موقع پر روانہ کر دیا گیا، 3 افراد زخمی ہوئے ہیں۔ جنہیں فوری طور پر ڈی ایچ کیو ہسپتال منتقل کر دیا گیا ہے۔

دوسری طرف سکیورٹی فورسز نے علاقے کو گھیرے میں لیکر سرچ آپریشن شروع کر دیا ہے۔

اُدھر مشیر داخلہ میر ضیاء اللہ لانگو نے کہا ہے کہ تربت فٹبال سٹیڈیم پر کریکر دھماکہ کی مذمت کرتے ہیں۔ ڈی سی سے واقعہ کی رپورٹ طلب کر لی ہے۔انہوں نے کہا کہ واقعے میں ملوث ملزمان کو فی الفور گرفتار کیا جائے گا۔ دہشت گردوں کے مقاصد کو ناکام بنایا جائے گا۔

واضح رہے کہ اس سے قبل تربت کے سنیما بازار میں دھماکے کے نتیجے میں چار افراد زخمی ہوگئے تھے۔

پولیس حکام کا کہنا تھا کہ حملے سے ایسا لگتا ہے کہ عسکریت پسند تربت کے علاقے میں ایف سی کی چیک پوسٹ کو نشانہ بنانا چاہتے تھے۔دھماکے میں زخمی ہونے والوں کو ڈسٹرکٹ ہیڈکوارٹر اسپتال تربت منتقل کردیا گیا تھا۔ جہاں انہیں طبی امداد فراہم کی گئی۔