ترک صدر دو روزہ دورے پر متحدہ عرب امارات پہنچ گئے

ترک صدر رجب طیب اردوان دو روزہ دورے پر متحدہ عرب امارات پہنچ گئے-

باغی ٹی وی : تفصیلات کے مطابق ترک صدر رجب طیب اردوان 2013 کے بعد متحدہ عرب امارات کے اپنے پہلے دورے پر پیر کو ابوظبی پہنچ گئے ہیں ترکی کے صدر دو روزہ دورے پر ہیں ابوظبی کے ولی عہد شیخ محمد بن زاید آل نہیان نے ان کا پُرتپاک خیرمقدم کیا۔

ترک صدر اپنے دورے کے دوران ابوظہبی اور دبئی میں ملاقاتیں کریں گے۔ صدر رجب طیب اردوان دبئی ایکسپو میں "ترک نیشنل ڈے” کا افتتاح کریں گے۔

أرحب بفخامة الرئيس التركي رجب طيب أردوغان في بلده الثاني الإمارات..سعدت بالحديث معه حول علاقاتنا الثنائية وحرصنا المشترك على تطويرها وتوسيعها..كما شهدنا تبادل اتفاقيات ومذكرات تفاهم في العديد من المجالات الحيوية بهدف مواصلة توثيق التعاون بين البلدين. pic.twitter.com/yJw8NJhtQb

— محمد بن زايد (@MohamedBinZayed) February 14, 2022

ابو ظبی کے ولی عہد شیخ محمد بن زاید آل نہیان نے سماجی رابطے کی ویب سائٹ ٹوئٹر پر اپنے ٹوئٹ میں بتایا کہ میں عزت مآب ترک صدر رجب طیب اردوان کو ان کے دوسرے ملک یو اے ای میں خوش آمدید کہتا ہوں مجھے ان سے اپنے دوطرفہ تعلقات اور ان کو بڑھانے اور بڑھانے کی ہماری مشترکہ خواہش کے بارے میں بات کرتے ہوئے خوشی ہوئی-

انہوں نے بتایا کہ ہم نے دونوں ممالک کے درمیان تعاون کو مستحکم کرنے کے مقصد کے ساتھ بہت سے اہم شعبوں میں افہام و تفہیم کے لئے معاہدوں اور یادداشتوں کے تبادلے کا مشاہدہ بھی کیا –

خیال رہے کہ ترک صدر رجب طیب اردوان نے ترکی سے اڑان بھرنے سے قبل اس امید کا اظہار کیا کہ ان کے دورے سے دونوں ممالک کے درمیان دوطرفہ تجارت کو فروغ ملےگا۔

انھوں نے کہا کہ متحدہ عرب امارات ترکی کے لیے ایک اہم اقتصادی منڈی ہے اور بہت سے ترک شہریوں کا دوسراگھر ہے۔ انھوں نے یہ بھی کہا کہ شیخ محمد کا حال ہی میں ترکی کا دورہ دونوں ملکوں کے درمیان تعلقات کے ایک ’’نئے مرحلے‘‘کی نمائندگی کرتا ہے۔