دیر میں بم پھٹنے سے پاک فوج کے دوجوان شہید

دیر:دیر میں بم پھٹنے سے پاک فوج کے دوجوان شہید ،اطلاعات کے مطابق کے پی کے ضلع دیر کے علاقے باروال میں سیکیورٹی فورسزدہشت گردوں کے خلاف آپریشن میں مصروف تھیں جب ایک بم پھٹنے کے نتیجے میں سپاہی ساجد علی (عمر 30 سال جوکہ کوٹلی آزاد کشمیر کے رہنے والے تھے اور سپاہی عدنان ممتاز عمر 32 سال، پونچھ، بھی آزاد کشمیرسے تعلق رکتھے تھے شہید ہوگئے

پاک فوج کی طرف سے کہا گیا ہے کہ علاقے میں کسی بھی دہشت گرد کے خاتمے کے لیے علاقے کی کلیئرنس کی جا رہی ہے۔ پاک فوج دہشت گردی کی لعنت کے خاتمے کے لیے پرعزم ہے اور ہمارے بہادر جوانوں کی ایسی قربانیاں رائیگاں نہیں جائیں گی۔

اس سے پہلے آئی ایس پی آر نے سوات میں کالعدم تنظیم تحریک طالبان پاکستان (ٹی ٹی پی) کے مسلح ارکان کی مبینہ موجودگی کی خبروں کو گمراہ کن قرار دے دیا۔

پاک فوج کے شعبہ تعلقات عامہ (آئی ایس پی آر) نے سوشل میڈیا پر سوات میں کالعدم تحریک طالبان پاکستان (ٹی ٹی پی) کی موجودگی کی خبروں کو غلط قرار دیتے ہوئے کہا کہ ٹی ٹی پی کے مسلح ارکان کی موجودگی کی رپورٹس مبالغہ آمیز ہیں۔

آئی ایس پی آر نے کہا کہ سوات اور دیر کے درمیان چند پہاڑی چوٹیوں پر کچھ افراد کی موجودگی دیکھی گئی، یہ مسلح افراد آبادی سے بہت دور موجود پائے گئے ہیں، بظاہر یہ افراد آبائی علاقوں میں دوبارہ آباد ہونے افغانستان سے آئے تھے۔

آئی ایس پی آر نے کہا کہ پہاڑوں میں محدود موجودگی، نقل وحرکت پر کڑی نظر رکھی ہے، سیکیورٹی حکام نے ملحقہ علاقوں کے عوام کی حفاظت کیلئے اقدامات اٹھائے ہیں

ترجمان نے کہا کہ عسکریت پسندوں کی کسی بھی جگہ موجودگی کو برداشت نہیں کرینگے، ضرورت پڑنے پر مسلح افراد سے طاقت کے ذریعے نمٹا جائے گا۔