اوچ شریف (باغی ٹی وی، نامہ نگار حبیب خان)معراج النبی کے حوالے سے شہر اولیاء اللہ اوچ شریف میں ہر سال کی طرح اس سال بھی سودھگان برادری کی جانب سے 176 واں سالانہ 5 روزہ اجتماع معراج سیدنا حضرت محمد صلی اللہ علیہ وسلم کی مناسبت سے شروع ہوگیا ہے۔ یہ اجتماع "معراج سیدنا حضرت محمد رسول اللہ صلی اللہ علیہ وسلم، عظمت صحابہ اور اہل بیت کانفرنس” کے عنوان سے فاروق اعظم جلسہ گاہ، محلہ سودھگان اوچ شریف میں منعقد ہو رہا ہے۔
اجتماع کا آغاز محفل حمد و نعت اور قرآن کی تلاوت سے کیا گیا، جس میں ملک بھر سے نامور علماء، شعراء اور قراء نے شرکت کی۔ دنیائے نقابت کے شہسوار مولانا قاضی مطیع اللہ سعیدی، عظیم ثناء خواں پروفیسر مطیع الرحمن نفیسی، حافظ حسن افضال صدیقی، شاعر اسلام حافظ عتیق الرحمن ککر اور زینت القراء قاری شعیب کمانوی نے اپنے فن کا مظاہرہ کیا۔
5 روزہ اجتماع میں 9 نشستوں پر مشتمل پروگرام ہوگا، جو ہر روز بعد نماز ظہر تا عصر اور بعد نماز عشاء تا رات 12 بجے تک جاری رہے گا۔ اس اجتماع کا اختتام 31 جنوری بروز جمعہ بعد نماز عشاء ہوگا۔
مقامی انتظامیہ نے سیکیورٹی کے سخت انتظامات کیے ہیں اور پولیس کی بھاری نفری جلسہ گاہ کے اطراف تعینات کی گئی ہے تاکہ شرکاء کی حفاظت کو یقینی بنایا جا سکے۔ ملک بھر سے عشقان رسول نے اس روحانی محفل میں بھرپور شرکت کی، جس سے اس اجتماع کا ماحول مزید معنویت اختیار کر گیا۔
