سلمان اکرم راجا چار گھنٹے بعد رہا

پاکستان تحریک انصاف (پی ٹی آئی) کے سیکرٹری جنرل سلمان اکرم راجا کو گرفتاری کے بعد رہا کردیا گیا۔ انہیں اسلام آباد کے علاقے نیلور سے حراست میں لیا گیا تھا۔ رہائی کے بعد سلمان اکرم راجا نے سوشل میڈیا پر جاری اپنے بیان میں کہا کہ انہیں لطاف حسین ستی، اخلاق ستی اور دیگر ساتھیوں سمیت تقریباً چار گھنٹے تک غیرمنصفانہ طور پر حراست میں رکھا گیا، جس کے بعد انہیں رہا کردیا گیا۔ سلمان اکرم راجا کے مطابق انہیں اور ان کے ساتھیوں کو حراست میں رکھنے کا واحد مقصد مرحوم اعجاز ستی کی نماز جنازہ میں شرکت سے روکنا تھا۔ انہوں نے کہا کہ چار گھنٹے کی حراست کے بعد انہیں لطاف حسین ستی، اخلاق ستی اور دیگر ساتھیوں سمیت رہا کردیا گیا۔ پی ٹی آئی سیکرٹری جنرل نے الزام عائد کیا کہ عوام کے خوف نے فیصلہ سازوں سے عقل اور سمجھ چھین لی ہے، جبکہ انسانی حقوق بے معنی ہو کر رہ گئے ہیں۔ انہوں نے اپنی رہائی کے بعد خیرخواہی اور نیک خواہشات کا اظہار کرنے والے دوستوں کا بھی شکریہ ادا کیا۔ اس سے قبل اپوزیشن کے ترجمان حسین احمد یوسفزئی نے ہم ڈیجیٹل سے گفتگو کرتے ہوئے بتایا تھا کہ پی ٹی آئی سیکرٹری جنرل سلمان اکرم راجا کو دیگر رہنماؤں کے ہمراہ گرفتار کرلیا گیا ہے۔ ان کے مطابق سلمان اکرم راجا پارٹی کارکن اعجاز ستی کی نماز جنازہ میں شرکت کے لیے جارہے تھے۔ پی ٹی آئی رہنماؤں نے الزام عائد کیا کہ پولیس نے نماز جنازہ میں شرکت کے لیے جانے والے پارٹی رہنماؤں اور کارکنوں کی نقل و حرکت میں رکاوٹیں ڈالیں اور متعدد افراد کو حراست میں لیا۔ پی ٹی آئی کے آفیشل ایکس اکاؤنٹ سے جاری پوسٹ میں بھی دعویٰ کیا گیا تھا کہ اعجاز ستی کی نماز جنازہ میں شرکت کے لیے جانے والے پارٹی رہنماؤں اور کارکنوں کو پولیس نے حراست میں لے لیا ہے۔ پارٹی کے مطابق کارکن اعجاز ستی کی نماز جنازہ میں شرکت کے لیے رہنما اور کارکن کوٹلی ستیاں جارہے تھے کہ اس دوران پی ٹی آئی کے سیکرٹری جنرل سلمان اکرم راجا، میرا کوٹلی ستیاں سے رکن قومی اسمبلی اور پارٹی کے نمائندے لطاف ستی سمیت دیگر افراد کو پولیس نے حراست میں لے کر اسلام آباد کے نیلور پولیس اسٹیشن منتقل کردیا۔ پی ٹی آئی نے مزید دعویٰ کیا تھا کہ اس سے قبل اس کے کارکن اعجاز ستی کو شہید کیا گیا اور اب لوگوں کو ان کی نماز جنازہ میں شرکت سے روکنے کے لیے گرفتاریاں اور مبینہ اغوا کیے جارہے ہیں۔ پارٹی نے رہنماؤں کی حراست کو غیرقانونی قرار دیتے ہوئے الزام عائد کیا کہ طاقت کے استعمال کے ذریعے کارکنوں اور رہنماؤں کو اعجاز ستی کی نماز جنازہ میں شرکت سے روکا جارہا ہے۔