شادی کی تیاریاں شروع، روما مائیکل اور شان بیگ نے تاریخ کا اعلان کردیا

پاکستانی ماڈل، اداکارہ اور بیوٹی کوئین روما مائیکل نے اداکار شان بیگ کے ساتھ اپنی شادی کی تاریخ کا باضابطہ اعلان کردیا، جس کے بعد دونوں کی شادی کی تقریبات کے حوالے سے مداحوں میں دلچسپی بڑھ گئی ہے۔

روما مائیکل نے فوٹو اور ویڈیو شیئرنگ پلیٹ فارم انسٹاگرام پر شان بیگ کے ہمراہ ایک خوبصورت ویڈیو شیئر کی، جس میں دونوں نے اپنی شادی کی تاریخ سے متعلق مداحوں کو آگاہ کیا۔

ویڈیو کے ساتھ RomaWedsShan# بھی استعمال کیا گیا، جس کے ذریعے جوڑے نے اپنی شادی کے اعلان کو سوشل میڈیا پر نمایاں کیا۔

شیئر کی گئی ویڈیو میں روما مائیکل دلہن کے لباس میں جبکہ شان بیگ نفیس سوٹ میں دکھائی دیے۔ دونوں نے دبئی کے ایک معروف ہوٹل میں شادی سے قبل خصوصی فوٹو شوٹ بھی کروایا، جس میں جوڑے نے مختلف انداز میں تصاویر اور ویڈیو بنوائیں۔

روما مائیکل اور شان بیگ کے مطابق ان کی شادی کی تقریبات 20 نومبر 2026ء کو کراچی میں منعقد ہوں گی۔ شادی کی تاریخ سامنے آنے کے بعد مداحوں کی جانب سے دونوں کیلئے نیک خواہشات اور مبارکبادوں کا سلسلہ بھی شروع ہوگیا۔

شادی کی تاریخ کے اعلان پر شوبز سے وابستہ شخصیات نے بھی روما مائیکل اور شان بیگ کو مبارکباد دی اور ان کی نئی زندگی کیلئے نیک تمناؤں کا اظہار کیا۔

سوشل میڈیا صارفین نے بھی جوڑے کی جانب سے شیئر کی گئی ویڈیو پر مختلف تبصرے کیے اور شادی کے اعلان پر خوشی کا اظہار کیا۔ روما مائیکل اور شان بیگ نے اس سے قبل اپنے تعلق کو نجی رکھا تھا اور دونوں کی جانب سے ذاتی زندگی کے حوالے سے زیادہ تفصیلات سامنے نہیں لائی گئی تھیں۔

تاہم اب شادی کی تاریخ کے باضابطہ اعلان کے بعد دونوں کی شادی کی تقریبات شوبز حلقوں اور مداحوں کی توجہ کا مرکز بن گئی ہیں۔ دونوں کی جانب سے شیئر کی گئی ویڈیو اور شادی کی تاریخ کے اعلان کے بعد اب مداح 20 نومبر کا انتظار کر رہے ہیں، جب کراچی میں ان کی شادی کی تقریبات منعقد ہوں گی۔