وفاقی بیوروکریسی میں ترقی کا انتظار ختم: سنٹرل سلیکشن بورڈ کا اجلاس طلب

وفاقی حکومت نے وفاقی بیوروکریسی میں گریڈ 20 اور 21 میں ترقی کے حوالے سے 14 ماہ سے زیر التوا سنٹرل سلیکشن بورڈ اجلاس طلب کر لیا ہے۔ اسٹیبلشمنٹ ڈویژن کی جانب سے جاری کردہ نوٹیفکیشن کے مطابق، یہ اجلاس 25، 26 اور 27 نومبر کو کیبنٹ بلاک اسٹیبلشمنٹ ڈویژن، اسلام آباد میں منعقد ہوگا۔اجلاس کا مقصد افسران کی گریڈ 19 سے 20 اور 20 سے 21 میں ترقی کی سفارشات کی منظوری دینا ہے۔ سنٹرل سلیکشن بورڈ کی مرتب کردہ سفارشات کی حتمی منظوری وزیراعظم دیں گے، جس کے بعد اسٹیبلشمنٹ ڈویژن ہر افسر کی ترقی، تقرر اور تبادلے کے حوالے سے نوٹیفکیشن جاری کرے گا۔
اجلاس کی صدارت چیئرمین فیڈرل پبلک سروس کمیشن کریں گے۔ نوٹیفکیشن میں یہ بھی کہا گیا ہے کہ سنٹرل سلیکشن بورڈ اجلاس کا ایجنڈا اور ورکنگ پیپرز جلد جاری کیے جائیں گے۔یہاں یہ امر قابل ذکر ہے کہ سنٹرل سلیکشن بورڈ کا اجلاس گزشتہ 14 ماہ سے زیر التوا ہے، اور اس کا آخری اجلاس اگست 2023 میں ہوا تھا۔ قواعد و ضوابط کے مطابق، سنٹرل سلیکشن بورڈ کے اجلاس کا انعقاد ہر سال دو مرتبہ لازمی ہے، جس سے یہ بات واضح ہوتی ہے کہ اس اجلاس کی اہمیت اور ضرورت کو سمجھا گیا ہے۔