وفاقی حکومت کورونا وائرس کے خلاف سست روی سے فیصلے کر رہی ہے،بلاول بھٹو زرداری
باغی ٹی وی :پاکستان پیپلزپارٹی کے چیئرمین بلاول بھٹو زرداری نے عالمی خبررساں ادارے اے ایف پی کو انٹرویو دیتے ہوئے کہا ہے کہ وفاقی حکومت کورونا وائرس کے خلاف سست روی سے فیصلے کر رہی ہے،وفاقی حکومت لاک ڈاﺅن کے لئے بھی کوئی ٹھوس فیصلہ کرنے میں ناکام نظر آتی ہے،
ان کا کہنا تھا کہ وفاقی حکومت صحت کے شعبے میں رقم مہیا کرنے کے لئے بھی تیار نہیں،اب تک پاکستان نے اس وباءسے 94لوگ فوت ہو چکے ہیں، پاکستان میں 5230 افراد میں کورونا وائرس کی تصدیق ہو چکی ہے، اس وباءکے پھیلنے کی ابتدا ہی سے ایک غلط احساس تحفظ کا اظہار کیا جا رہا ہے، ہم اس حقیقت کو نظرانداز کر رہے ہیں کہ دنیا بھر میں یہ وباءکس قدر تیزی سے پھیل رہی ہے،وباء کی تیزی کا احساس نہ ہونے کی وجہ سے ہمیں بروقت ضروری اقدامات اٹھانے میں مشکلات پیش آرہی ہیں،
چیئرمین بلاول بھٹو زرداری کا کہنا تھا کہ پاکستان میں صحت کے ماہرین نے یہ تجویز دی تھی کہ پورے ملک میں سخت اقدامات کئے جائیں، ہم معیشت کو دوبارہ زندہ کر سکتے ہیں لیکن لوگوں کو دوبارہ زندہ نہیں کر سکتے،ہم صرف یہ امید نہیں کرسکتے کہ سب خود اچھا ہوجائے گا، اگر ہم اپنی تیاری نہ کریں تو پاکستان بہت خاموشی سے ایک تباہی کی صورتحال کی طرف جاسکتا ہے، پاکستان میں صورتحال امریکہ اور مغربی یورپ سے بھی بری ہو سکتی ہے، پاکستان میں حفاظتی لباس اور طبی عملے کی کمی کے ساتھ ساتھ دیگر طبی آلات کی بھی کمی ہے،
