موسیقار وزیر افضل کی نماز جنازہ ادا کردی گئی

لاہور: موسیقار وزیر افضل کی نماز جنازہ ادا کردی گئی۔

باغی ٹی وی : تفصیلات کے مطابق آج صبح 87 سال کی عمر میں انتقال کرنے والے موسیقار وزیر افضل کی نماز جنازہ مسجد شاہ خراساں، سمن آباد میں ادا کی گئی۔ مرحوم کو مقامی قبرستان میں سپرد خاک کیا گیا۔

نماز جنازہ میں میوزک انڈسٹری سے وابستہ افراد سمیت مختلف شعبہ ہائے زندگی سے تعلق رکھنے والے لوگوں اور عزیز و اقارب نے شرکت کی۔

عالمی شہرت یافتہ موسیقار خواجہ خورشید انور کے شاگرد موسیقار وزیر افضل نے پاکستان کی 73 سے زائد فلموں کے 209 گانوں کی موسیقی ترتیب دی۔

سات سروں کا بہتا دریا، سیو نے میراے دل دا جانی، تو قرار میرا یا میرے جانیا اور کہندے نیں نیناں تیرے کول رہنا جیسے لازوال گیتوں کی موسیقی وزیر افضل نے ترتیب دی تھی گلوکارہ نورجہاں نے ان کے بے شمار نغمے گائے جب کہ مسعود رانا، مہدی حسن اور ترنم ناز نے بھی ان کے ترتیب دیے گئے سروں پہ اپنی آواز کا جادو جگایا۔

حکومت پاکستان نے بھی ان کی خدمات کے اعتراف میں 14 اگست 2010 کو انھیں صدارتی تمغہ برائے حسن کارکردگی عطا کیا تھا مرحوم طویل عرصے سے بیمار تھے انہیں گردوں کا عارضہ لاحق تھا اور شوگر کے بھی مریض تھے۔