لاہور:پی ٹی آئی ایم پی اے چوہدری مسعود پاکستان سے ترکی کے لیے کب اورکیسے روانہ ہوئے؟اس حوالے سے پاکستان تحریک انصاف (پی ٹی آئی) کے ممبر پنجاب اسمبلی چوہدری مسعود مجیدکی ترکیہ روانگی کی تفصیلات سامنے آگئی ہیں۔
ذرائع کے مطابق چوہدری مسعود مجید رات 3 بج کر27 منٹ پرترکیہ روانہ ہوئے، مسعود مجید ترکش ائیرلائن کی پرواز ٹی کے 715 پرلاہور سے استنبول روانہ ہوئے۔
ادھراپوزیشن لیڈر سبطین خان نے کہا ہے کہ آج پارلیمانی پارٹی کے اجلاس میں 175 ارکان کی گنتی مکمل تھی۔
تفصیلات کے مطابق اپوزیشن لیڈر سبطین خان نے تحریک انصاف کے ایک رکن کے منحرف ہونے کی تصدیق کرتے ہوئے کہا کہ رحیم یار خان سے ایم پی اے میاں مسعود کی بولی لگ گئی ہے۔
ان کا کہنا تھا کہ آج پارلیمانی پارٹی کے اجلاس میں 175 ارکان کی گنتی مکمل تھی، کل پارلیمانی پارٹی کے اجلاس میں 187 ارکان مکمل ہوں گے۔
انہوں نے کہا کہ کچھ ارکان بیماری یا شہر سے باہر ہونے کی وجہ سے آج اجلاس میں نہیں پہنچے، جو رکن آج پارلیمانی پارٹی کے اجلاس میں نہیں آئے انہوں نے ہمیں اعتماد میں لیا تھا۔
اس کے علاوہ سبطین خان نے ایک اور بیان میں کہا کہ آصف علی زرداری اور چوہدری شجاعت حسین کی ملاقات سے کوئی مسئلہ نہیں ہے۔
