خیبرپختونخوا(کے پی کے) حکومت نے بھارتی لیجنڈری اداکار دلیپ کمار کے گھر پر سیکشن 4 نافذ کردی ہے۔
باغی ٹی وی : کے پی حکومت نے بھارتی لیجنڈری اداکار دلیپ کمار اور کپور خاندان کی پشاور میں واقع آبائی رہائش گاہوں کو خرید کر میوزیم میں تبدیل کرنے کا فیصلہ کیا تھا۔
اس معاملے پر اب وزیر اطلاعات کامران بنگش نے بتایا کہ محکمہ آثار قدیمہ نے دلیپ کمار کے گھر کو خریدنے کے لیے ضلعی انتظامیہ کو خط لکھا تھا۔
تاہم اس کے بعد ضلعی انتظامیہ کی جانب سے دلیپ کمار کے گھر پر سیکشن 4 نافذ کردی گئی ہے۔
کامران بنگش کا کہنا ہے کہ حکومت دلیپ کمار کا 4 مرلے کا گھر خریدنے کا عزم رکھتی ہے۔
کامران بنگش نے بتایا کہ پہلے مرحلے میں گھر کو خریدا جائے گا جس کے لیے حکومت فنڈ مہیا کر رہی ہے۔
کامران بنگش کا کہنا تھا کہ دوسرے مرحلے میں گھر کی مرمت اور اس کی اصلی حالت میں بحالی کا کام ہوگا بحالی پلان کے تحت گھر کو میوزیم میں تبدیل کردیا جائے گا۔
واضح رہے کہ دلیپ کمار کی اہلیہ نے بھی اپنے شوہر کے آبائی گھر کی خریداری اور پھر اسے میوزیم میں تبدیل کرنے کے حکومتی فیصلے کی تعریف کی تھی۔
انہوں نے اپنے ایک انٹرویو میں خیبر پختونخوا کے اقدام کی تعریف کرتے ہوئے کہا تھا کہ میں پاکستان کی صوبائی حکومت کی کوششوں پر بہت خوش ہوں اور مجھے پوری اُمید ہے کہ وہ اپنے اس اقدام میں ضرور کامیاب ہوں گے-
دوسری جانب دلیپ کمار نے بھی سماجی رابطے کی ویب سائٹ ٹوئٹر پر اپنے مداؤحں کے ساتھ اپنے آبائی گھر کی یادیں شئیر کیں تھیں-
واضح رہے کہ دلیپ کمار کی پیدائش پشاور کے حالیہ علاقے قصہ خوانی بازار میں 1922 میں مسلمان گھرانے میں ہوئی تھی اور ان کا اصل نام محمد یوسف ہے۔دلیپ کمار کو ان کی فلمی خدمات پر حکومت پاکستان نشان امتیاز سے بھی نواز چکی ہے۔اسی طرح راج کپور کی پیدائش پشاور کے حالیہ علاقے حویلی دلگران میں ہندو خاندان میں 1924 میں ہوئی تھی۔
دونوں با لی وڈ لیجنڈز کے علاوہ بھی دیگر چند با لی وڈ شخصیات پشاور اور خیبرپختونخوا کے دیگر علاقوں میں پیدا ہوئی تھیں جب کہ متعدد شخصیات حالیہ پاکستان کے دیگر صوبوں پنجاب، سندھ اور بلوچستان کے کچھ علاقوں میں بھی پیدا ہوئی تھیں۔
