fbpx

ضمنی الیکشن میں تحریک انصاف کی بھرپور سپورٹ کریں گے،پرویزالہی

سپیکر پنجاب اسمبلی چودھری پرویزالٰہی سے صدر پاکستان مسلم لیگ ضلع خوشاب اور ٹکٹ ہولڈر چودھری رضوان مختار رندھاوا نے وفد کے ہمراہ ملاقات کی.اس موقع پر سپیکر پنجاب اسمبلی چودھری پرویزالٰہی نے کہا کہ پنجاب میں دو نمبر حکومت قائم ہے.

چودھری پرویزالٰہی کا کہنا تھا کہ جعلی حکمرانوں کو عوام کی حمایت حاصل نہیں، آئی ایم ایف کی تمام شرائط کے ساتھ یکطرفہ معاہدے خود کر رہے ہیں، آئی ایم ایف کی طرف سے کچھ نہیں اور نام عمران خان کا لگاتے ہیں، روز بروز بڑھتی مہنگائی اور پٹرول کی قیمتوں میں اضافے سے عام آدمی کا جینا مشکل ہو گیا

چودھری پرویزالٰہی نے مزید کہا کہ جعلی حکمرانوں نے ملکی معیشت کو تباہ کر دیا ہے،چودھری پرویزالٰہی نے ضمنی الیکشن کے حوالے سے پارٹی عہدیداروں اور کارکنوں کو ہدایات بھی جاری کیں ان کا کہنا تھا کہ ضمنی الیکشن میں پاکستان تحریک انصاف کی بھرپور سپورٹ کریں.

سپیکر پنجاب اسمبلی نے کہا کہ تحریک انصاف کے امیدواروں کے ساتھ مل کر ان کی الیکشن مہم چلائی جائے، ڈور ٹو ڈور رابطہ عوام مہم شروع کی جائے، کارنر میٹنگ اور جلسوں کا انعقاد کیا جائے، پارٹی ورکر الیکشن مہم ایسے چلائیں جیسے وہ خود الیکشن لڑ رہے ہیں، ضمنی الیکشن میں جاندار مہم چلا کر تحریک انصاف کو سیٹیں جتوائی جائیں.

چودھری پرویزالٰہی سے ملاقات کرنے والوں میں سبطین شیرازی ایڈوکیٹ جنرل سیکرٹری ضلع خوشاب، محترمہ شازیہ کوثر ایڈووکیٹ صدر خواتین ونگ خوشاب ،چودھری احمد سعید صدر یوتھ ونگ خوشاب، ملک انور ایڈووکیٹ صدر ہیومین رائٹس، ملک احسن عمران انفارمیشن سیکرٹری کلچرل ونگ شامل تھے.