موت سب سے بڑی حقیقت ہےجس کو ہر شخص بھلا بیٹھا ہے اور زندگی سب سے بڑا دھوکہ ہے جس کے پیچھے ہر شخص بھاگ رہا ہے۔زندگی ایک خوبصورت جھوٹ اور موت ایک کڑوا سچ ہے۔ہم سب اس بات سے واقف ہیں کہ زندگی اللہ تعالیٰ کی دی ہوئی سب سے بڑی نعمت ہے۔اکثر لوگ زندگی کا یہ مطلب نکالتے ہیں کہ بس صبح جاگیں، کام پر جائیں، وآپس آئیں ،کھانا کھائیں ، سو جا ئیں اور کچھ عرصے بعد مر جائیں۔ زندگی محض خود کو ایک مشین بنا دینے کا نام نہیں بلکہ زندگی ہمارے کیے گئے اچھے اور برے اعمال کا کمرہِ امتحان ہے۔جس کا نتیجہ روزِ محشر سنایا جائے گا۔ اللہ عز و جل نے ہمیں پیدا کیا تاکہ ہمیں آزمائے اور ہمارا امتحان لے، جیساکہ اللہ تعالیٰ نے سورۃ الملک میں فرمایا:
"وہی ہے جس نے موت وحیات کو اس لئے پیدا کیا کہ تمہیں آزمائے کہ تم میں سے اچھے کام کون کرتا ہے۔” (الملک:2)
ہم انسان چاہے جتنی بھی کوشش کرلیں جتنے بھی جتن کر لیں پر موت کی اٹل حقیقت کو نہیں ٹال سکتے کیونکہ ایک نہ ایک دن ہم سب نے خالقِ حقیقی سے جا ملنا ہیں جیساکہ اللہ تعالیٰ نے سورۃ آل عمران میں فرمایا
” ہر نفس نے موت کا ذائقہ چکھنا ہے۔” (الملک:185)
اصل زندگی وہی ہے جس میں روحانیت ہو۔روحانی زندگی کیا ہے اللہ کی یاد اور ذکر میں لگے رہنا، درودوسلام کا ورد کرتے رہنا۔ اللہ کی دی ہوئی صلاحیتوں کو اجاگر کرنا اور لوگوں تک پہنچانا تا کہ ان کے لیئے باعث ِفائدہ اورنمونہ ہو۔غریبوں اور کمزوروں کی مدد کرنا ، رہنمائی کرنا اور ان کی جہاں تک ممکن ہو مالی مدد کرنا ، ظلم کے خلاف اور مظلوم کے ساتھ کھڑا ہونا، کسی مشکل میں پھنسے شخص کو دلاسا دینا۔کسی نا انصافی کرنے والے کے خلاف کھڑے ہونا، اپنی عبادات کا اہتمام کرنا اور دوسروں کو بھی عبادت کی تلقین کرنا ۔حلال کھانا، ہمیشہ سچ بولنا، امانتوں کا خیال رکھنا ، موت کو یاد رکھنا، قبرستان جانا ، عبرت حاصل کرنااور وہاں بسنے والوں کے لیئے دعاۓمغفرت کرنا ۔ یہی کامیاب زندگی ہے ۔ زندگی ایسی گزاروکہ زندگی کو فخر ہو کہ کوئی اسے ایسے گزار کر گیا جیسے گزانے کا حق تھا ، اور قبر کو بھی فخر ہو کہ اس میں رسول ِ پاک ؐ کا سچا عاشق اور غلام آیا ہے ۔ اللہ تعالیٰ ہم سب کو آخرت کی صحیح معنوں میں تیاری کرنے کی توفیق عطا فرمائیں۔(آمین)
موت کی آغوش میں جس دن ہمیں سونا ہوگا
نہ کوئی تکیہ ہوگا نہ کوئی بچھونہ ہوگا
ساتھ ہوں گے اعمال ہمارے
اور قبرستان کا چھوٹا سا کونا ہوگا
Twitter: @Aladdin_Hu_Me
زندگی اور موت تحریر:ازان حمزہ ارشد
