عمران خان کا الیکشن کرانے کا مطالبہ حکومتی اتحاد نے مسترد کر دیا

حکومت کی اتحادی جماعتوں نے سابق وزیر اعظم اور پی ٹی آئی چئیرمین عمران خان کا الیکشن جلد کرانے کا مطالبہ مسترد کر دیا۔

باغی ٹی وی : اپنے مشترکہ بیان میں اتحادی جماعتوں نے سابق صدر آصف علی زرداری ، پاکستان مسلم لیگ (ن) کے قائد اور سابق وزیراعظم محمد نوازشریف کے خلاف بیان اور الزامات کی شدید الفاظ میں مذمت کی گئی۔

انہوں نے بیان میں کہا کہ ملک میں انتخابات کب ہونے ہیں، اس کا فیصلہ حکومتی اتحادی جماعتیں کریں گی کسی جتھے کو طاقت کی بنیاد پر فیصلہ مسلط کرنے کی اجازت نہیں دیں گے۔ قانون ہاتھ میں لینے والوں کو آئین اور قانون کے مطابق نمٹیں گے وزیراعظم پاکستان قانون کے مطابق آرمی چیف کی تقرری کا فیصلہ کریں گے، فارن فنڈڈ فتنے کی دھونس، دھمکی اور ڈکٹیشن پر نہیں ہوگی۔

بیان میں کہاگیا کہ آرمی چیف، حساس اداروں کی قیادت، افسران، چیف الیکشن کمشنر سمیت دیگر کو نشانہ بنانے کا مقصد ’بلیک میلنگ‘ ہے جو قطعاً سیاسی رویہ نہیں بلکہ سازش کا حصہ ہے جسے کامیاب نہیں ہونے دیا جائے گا۔ آئین اور قانون میں واضح ہے کہ آرمی چیف سمیت دیگر عہدوں پر تقرری وزریراعظم کا دستوری اختیار ہے۔

بیان میں کہا گیا کہ اقتدار سےمحروم شخص قومی اداروں کو ایک سوچے سمجھے ایجنڈے کے تحت نشانہ بنارہا ہے۔ پاک فوج کے شہداءکے خلاف غلیظ مہم، فوج میں بغاوت کےبیانات اور حوصلہ افزائی جیسےاقدامات ملک دشمنی کے مترادف ہیں جن سےآئین اور قانون کے مطابق نمٹاجائے گا۔غنڈہ گردی اور دھونس کی بنیاد پر آئین ، جمہوریت اور نظام کوغلام نہیں بننے دیاجائے گا۔

بیان میں یہ بھی واضح کیا گیاکہ ملک کی معیشت اور سیلاب متاثرین کی بحالی اس وقت اولین قومی ترجیح ہے جس پر کوئی سمجھوتہ نہیں کیاجائے گا۔ حکومت، اداروں اور عوام کا اتفاق ہے کہ سیاسی عدم استحکام پیداکرنے کی اجازت نہیں دی جائے گی جبکہ معیشت کو پٹڑی سے اتارنے اور وسائل کی متاثرین سیلاب تک رسائی کے عمل کو کسی صورت متاثر نہیں ہونے دیا جائے گا۔

دوسری جانب وزیرداخلہ رانا ثناءاللہ نے کہا ہے کہ آرمی چیف کی تعیناتی کا وقت آچکا، عمران خان نے گاڑی مس کر دی نجی خبررساں ادرے سے گفتگو کرتے ہوئے انہوں نے کہا کہ ان کے خیال میں نوازشریف آرمی چیف کی تعیناتی میں کوئی مداخلت نہیں کریں گے آرمی چیف کی تعیناتی کا فیصلہ وزیراعظم ہی کریں گے، سب کچھ آئین اور قانون کے مطابق ہوگا-

انہوں نے کہا کہ جتھے کے ذریعے الیکشن کی تاریخ نہیں دیں گے، فیصلہ جتھے سے ہوا تو الیکشن کے بجائے جتھے کی تیاری کریں گے عمران خان پچیس مئی کی کال نہ دیتے تو شائد اسی وقت الیکشن کی تاریخ آجاتی حکومت کی وجہ سے پی ٹی آئی والوں کی بدتمیزی برداشت کر رہے ہیں، نگران سیٹ اپ آتے ہیں پارٹی کو ہدایت دیں گے، جہاں تحریک انصاف والے بدتمیزی کریں، وہیں انہیں دبوچ لیں۔

لانگ مارچ: تاجربرادری کا اسلام آباد کو احتجاج فری شہر بنانے کا مطالبہ