سابق ملازمین کا بقایاجات کی عدم ادائیگی کے خلاف آپ نیوز دفتر کے سامنے شدید احتجاج

سابق ملازمین کا بقایاجات کی عدم ادائیگی کے خلاف آپ نیوز دفتر کے سامنے شدید احتجاج

باغی ٹی وی رپورٹ کے مطابق آپ نیوز کے سابق ملازمین کے بقایاجات کی عدم ادائیگی کے خلاف آپ نیوزکے دفترکے باہرشدید احتجاجی مظاہرہ کیا گیا۔مظاہرہ میں لاہور پریس کلب کے صدر ارشد انصاری، سیکرٹری بابرڈوگر،ممبر گورننگ باڈی عمران شیخ، حسن تیمورجکھڑ، پی ایف یوجے کے جنرل سیکرٹری رانامحمد عظیم ، پی یوجے کے صدر قمرالزمان بھٹی ، جنرل سیکرٹری خواجہ آفتاب سمیت آپ نیوزکے کارکنوں اور صحافیوں کی بڑی تعداد نے شرکت کی ۔ اس موقع پر صحافی تنظیموں اور کارکنوں نے ملک ریاض کے خلاف شدید نعرے بازی کی اور دفتر کے سامنے دھرنادیا۔ پریس کلب کے صدر ارشد انصاری نے خطاب کرتے ہوئے کہاکہ آج ہم صحافی کارکنوں کا حق لینے کے لئے اکھٹے ہوئے ہیں اور ہم ذمہ داران سے حق وصول کئے بغیر یہاں سے نہیںجائیں گے ۔

دھرنے کے دوران کوئی بھی ذمہ دار آپ نیوزکی بلڈنگ سے باہر نہ آیا جس پر صدر ارشد انصاری، بابرڈوگر،رانا محمد عظیم ، قمرالزمان بھٹی بلڈنگ کا سکیورٹی حصار توڑ کر اندر داخل ہوگئے لیکن بلڈنگ خالی تھی اور کوئی بھی ذمہ دار موجود نہ تھا ۔جس پر ٹیلی فون پر عمران میر سے رابطہ کیا گیاجنھوں نے دھرنے کے شرکاءکو بتایاکہ آپ کے دھرنے اور احتجاج کی خبر اوپرتک ذمہ داران کو دے دی گئی ہے اور امید ہے کہ ایک سے دودن میں مسئلہ حل کرلیاجائے گا۔ دھرنے کے شرکاءنے دو دن میں مسئلہ حل نہ ہونے پر احتجاج کے تمام راستے اختیار کرنے کا اعلان کرتے ہوئے کہا کہ احتجاج کے دوران ہرقسم کے حالات کی تمام تر ذمہ داری ملک ریاض پرعائد ہوگی۔
بابرڈوگر
سیکرٹری