اسلام آباد کے سرکاری ہسپتالوں میں ادویات کی عدم فراہمی بارے جہاں سے بھی شکایت ملی سخت کارروائی عمل میں لائی جائے گی، وزارت صحت
وزارت صحت کی جانب سے قومی اسمبلی کو بتایا گیا ہے کہ اسلام آباد کے سرکاری ہسپتالوں میں ادویات کی عدم فراہمی کے حوالے سے جہاں سے بھی شکایت ملی سخت کارروائی عمل میں لائی جائے گی۔ جمعے کو قومی اسمبلی میں وقفہ سوالات کے دوران نصیبہ چنا کے سوال کے جواب میں پارلیمانی سیکرٹری صحت نے کہا کہ اسلام آباد کے تمام ہسپتالوں میں بریسٹ کینسرکے تمام ٹیسٹ مفت کئے جارہے ہیں۔
ڈاکٹر مہرین رزاق بھٹو کے سوال کے جواب میں پارلیمانی سیکرٹری صحت ڈاکٹر شازیہ ثوبیہ نے کہا کہ ادویات کی عدم فراہمی کے حوالے سے اسلام آباد کے کسی ہسپتال سے بھی شکایت ملی تو اس کے خلاف سخت کارروائی کی جائے گی۔ طاہرہ اورنگزیب کے سوال کے جواب میں پارلیمانی سیکرٹری صحت ڈاکٹر شازیہ ثوبیہ نے کہا کہ چک شہزاد میں دل کے مریضوں کا صرف ایمرجنسی علاج کیا جاتا ہے باقی آپریشن وغیرہ پمز میں ہوتے ہیں، پولی کلینک میں بھی دل کے آپریشن کے لئے منصوبہ جلد مکمل کیا جائے گا۔
مزید یہ بھی پڑھیں؛ بلبل پنجاب کا خطاب پانے والی گلوکارہ اور شاعرہ کا یوم پیدائش
پاکستان اور ترکیہ کے تعلقات تزویراتی شراکت داری کے نئے دور میں داخل. وزیر اعظم
لاپتہ افراد کیس، تحقیقات مکمل کی جائیں، عدالت
نصیبہ چنا کے سوال کے جواب میں انہوں نے کہا کہ عوام کی شکایات کو مدنظر رکھتے ہوئے ادویات کی فراہمی کے لئے اقدامات اٹھائے جارہے ہیں۔ طاہرہ اورنگزیب کے سوال کے جواب میں پارلیمانی سیکرٹری صنعت و پیداوار شاہدہ رحمانی نے کہا کہ گاڑیوں پر اون ختم کرنے کے لئے حکومت نے ٹیکس میں اضافہ کیا ہے، گاڑیوں کی قیمتیں بڑھنے کی بنیادی وجہ روپے کے مقابلے میں ڈالر کی قیمت میں اضافہ ہے، حکومت گاڑیوں کی صنعت کی زیادہ سے زیادہ حوصلہ افزائی کے لئے مقامی سرمایہ کاروں کی حوصلہ افزائی کے لئے اقدامات کر رہی ہے۔
