ایک اور کمسن بچی درندہ صفت انسان کی ہوس کی بھینٹ چڑھ گئی

ایک اور کمسن بچی درندگی کا نشانہ بن گئی

باغی ٹی وی رپورٹ کے مطابق ،ایک اور بچی درندگی کا نشانہ بنی ہے جس کی نعش برآمد کر لی گئی ،

باغبانپورہ میں کمسن بچی کو مبینہ زیادتی کے بعد قتل کرنے کا افسوسناک واقعہ پیش آیا ، کمسن بچی کی لاش گھر کے قریب خالی پلاٹ سے ملی۔ قاتل ہمسایہ نکلا جسے پولیس نے کارروائی کرتے ہوئے دھر لیا۔ ابتدائی تفتیش کے دوران ملزم نے قتل کا اعتراف بھی کر لیا۔ ایس پی کینٹ انویسٹی گیشن ڈاکٹر انوش مسعود کی سربراہی میں سپیشل ٹیموں نے ملزم کو حراست میں لیا۔

تفصیلات کے مطابق ابتدائی تفتیش کے مطابق ملزم ندیم شادی شدہ ہے اور 9 ماہ کے ایک بیٹے کا باپ ہے، ملزم بچی کو ورغلا کر اپنے گھر لے گیا اور زیادتی کےبعد قتل کر دیا۔ ملزم ندیم واردات کے بعد گھر کو تالا لگا کر چلا گیا۔ گزشتہ رات تین بجے کے قریب ملزم نے بچی کی لاش پلاٹ میں پھینک دی۔ایس پی کینٹ سعد عزیز کا کہنا ہے کہ فرانزک ٹیموں نے بچی کے خون کے نمونے اورملزم کے گھر سے شواہد اکٹھے کر لئے، مزید حقائق پوسٹ مارٹم اور فرانزک رپورٹ کے بعد سامنے آئیں گے۔

اس سلسے میں ایس پی کینٹ نے مقتولہ کے والدین سے ملاقات کی اور مکمل تعاون کا یقین دلایا، وزیراعلیٰ عثمان بزدارنے واقعہ کا نوٹس لیتے ہوئے سی سی پی او سے رپورٹ طلب کر لی۔ انہوں نے کہا کہ متاثرہ خاندان کو ہر قیمت پر انصاف فراہم کیا جائے گا۔ سی سی پی او لاہورعمر شیخ نےکہا ہے کہ ملزم کو جلد کیفرکردار تک پہنچایا جائے گا