القدس بریگیڈ نے شہید فلسطینی کمانڈر کی لاش کی بے حرمتی کا بدلہ لینے کا اعلان کر دیا

القدس بریگیڈ نے شہید فلسطینی کمانڈر کی لاش کی بے حرمتی کا بدلہ لینے کا اعلان کر دیا

باغی ٹی وی .مرکز اطلاعات فلسطین کے حوالے سے اسلامی جہاد کے عسکری ونگ القدس بریگیڈ نے گذشتہ روز اسرائیلی فوج کی وحشیانہ کارروائی میں ایک کمانڈر کی شہادت پر افسوس کا اظہار کرتے ہوئے شہید کی لاش کی بے حرمتی کو غیر انسانی واقعہ قرار دیا ہے۔

القدس بریگیڈ کا کہنا ہے کہ شہید کے جسد خاکی کی توہین اور بے حرمتی ایک سنگین اور وحشیانہ جرم ہے جس کا بدلہ لیا جائے گا۔

القدس بریگیڈ کی طرف سے جاری ایک تعزیتی بیان میں کہا گیا ہے کہ گذشتہ روز صہیونی فوج نے منظم دہشت گردی اور بربریت کا مظاہرہ کرتے ہوئے 27 سالہ کمانڈر محمد علی حسن الناعم کو نہ صرف شہید کیا بلکہ اس کی لاش کی بھی بے حرمتی کی گئی۔ القدس بریگیڈ اس سنگین جرم پر صہیونی فوج سے بدلہ لے گی۔ بیان میں کہاگیا ہے کہ صہیونی جلد اپنے اس وحشیانہ جرم پرانتقام کی آگ میں جلیں گے۔

خیال رہے کہ گذشتہ روز اسرائیلی فوج نے خان یونس کے مقام پر فلسطینیوں کے ایک گروپ پر فائرنگ کرکے ایک فلسطینی کو شہید اور چار کو زخمی کردیا تھا۔ شہید فلسطینی کا جسد خاکی اٹھانے کی کوشش کے دوران اسرائیلی فوجیوں نے بلڈوزر کی مدد سے لاش کو گھیسٹا اور اس کے بعد اسے اٹھا کر ایک ٹینک میں ڈال دیا گیا۔

اس مجرمانہ اور وحشیانہ واقعے پر فلسطینی عوام میں شدید غم وغصے کی لہر دوڑ گئی ہے۔