عرشی خان افغانستان میں مقیم اپنے رشتہ داروں کے لئے پریشان

بھارت کے مقبول رئیلیٹی شو بگ باس سے شہرت حاصل کرنے والی اداکارہ عرشی خان کا کہنا ہے کہ وہ افغانستان میں مقیم اپنے دوستوں اور رشتے داروں کیلئے سخت پریشان ہیں۔

باغی ٹی وی : افغانستان میں طالبان کے مکمل کنٹرول کے بعد اداکارہ عرشی خان نے ایک انٹرویو میں اپنی پریشانی اور افغانستان کے موجودہ حالات پر اپنے خیالات کا اظہار کیا-

انہوں نے کہا کہ میں بھی ایک افغان پٹھان خاتون ہوں، افغانستان میں پیدا ہوئی، بعدازاں اپنے خاندان کے ہمراہ ہجرت کرکے بھارت آگئی، اب طالبان کے کنٹرول کے بعد سے افغان خواتین شہریوں کے لیے بہت پریشان ہوں۔

عرشی خان کا کہنا تھا کہ افغان شہریوں اور ملک کی حالت دیکھ کر حقیقتاً تکلیف ہوئی، یہاں تک کہ کھانا بھی صحیح طریقے سے نہیں کھا پا رہی ہوں میں اور میرے گھر والے افغانستان کے لیے دُعا کررہے ہیں کہ خدا جلد از جلد ان کی مدد کرے، ہم بے بس ہیں، دعاؤں کے علاوہ کچھ نہیں کرسکتے۔

اُنہوں نے کہا کہ ’میرے رشتہ دار اور دوست اب بھی افغانستان میں موجود ہیں، یہ بہت بُرا وقت ہے کیونکہ ہم بےبس ہیں اور اُن کے لیے کچھ نہیں کرسکتے ہیں-