کراچی : کورنگی مہران ٹاؤن میں شعبہ تفتیش میں تعینات پولیس انسپکٹر بیٹے کی فائرنگ سے جاں بحق ہوگیا۔
باغی ٹی وی: طلاعات کے مطابق واقعہ کراچی کے علاقے کورنگی مہران ٹاؤن میں آج صبح 7 بجے کے قریب پیش آیا جب گھریلو تنازع پرنوجوان بیٹے نے والد پولیس انسپکٹر کو اسی کی سرکاری پستول سے دو گولیاں مار کر قتل کر دیا ، واقعے کے بعد ملزم فرار ہو گیا جس کی گرفتاری کے لیے چھاپے مارے جا رہے ہیں۔
تھانہ درخشان کے شعبہ انویسٹی گیشن میں تعینات پولیس انسپکٹر دیدار عباسی نے اپنے بیٹے کامران عباسی کو گزشتہ رات کسی بات پر مارا پیٹا تھا جس کے بعد باپ بیٹا دونوں سونے کیلئے چلے گئے ، مگر ملزم نے رنجش دل میں رکھی اور صبح والد کو سوتے میں ہی پستول سے دو گولیاں ماریں جس سے وہ موقع پر ہی چل بسا۔
ایس ایس پی شاہجہان خان کے مطابق مقتول دیدار عباسی ضلع ملیر کے میمن گوٹھ تھانے کے ایس ایچ او خالد عباسی کا بھائی تھا۔
