ڈی سی شیخوپورہ نے رپورٹ طلب کر لی

ڈپٹی کمشنر شیخوپورہ چوہدری محمد اصغر جوئیہ نے محکمہ لوکل گورنمنٹ اینڈ کمیونٹی ڈویلپمنٹ میں سنگین بدعنوانیوں اور بے ضابطگیوں کے مبینہ الزامات کے بارے میں رپورٹ طلب کر لی ہے یہ رپورٹ ڈپٹی کمشنر کو دی جانے والی ایک تحریری درخواست پر طلب کی گئی ہے جس کو ڈی سی آفس میں ڈائری نمبر 5089 کے تحت جمع کروایا گیا تھا اس درخواست میں کہا گیا ہے کہ چند روز قبل مذکورہ محکمہ میں ہونے والے کروڑوں روپے مالیت کے ترقیاتی کاموں کے ٹینڈروں میں پول ہوا جس میں مبینہ طور پر ایکسین میاں مدثر قائم مقام ایس ڈی او خواجہ ظہیر الدین اور کلرک محمد اعظم سمیت کئی افسران شامل ہیں

جنہوں نے اپنے من پسند ٹھیکیداروں کو فل ریٹ پر ترقیاتی کام دے کر ایک طرف سرکاری خزانے کو کروڑوں روپے کا نقصان پہنچایا اور دوسری طرف خود لاکھوں روپے کمیشن وصول کی اس محکمہ میں ایسے لوگ کام کر رہے ہیں جو ماضی میں کئی مرتبہ سنگین الزامات کی وجہ سے معطل ہوچکے ہیں ایسے افراد اور ان کے رشتہ داروں کے اثاثوں اور بینک اکاؤنٹس کا ریکارڈ اکٹھا کیا جائے اور موبائل فونز کا ڈیٹا حاصل کیا جائے تو اہم انکشافات ہوسکتے ہیں اور قومی خزانہ مزید لوٹ کھسوٹ سے بچ سکتا ہے درخواست میں یہ اہم انکشاف بھی کیا گیا ہے کہ محکمہ لوکل گورنمنٹ اینڈ کمیونٹی ڈویلپمنٹ میں کئی برس تک ایک جعلی سب انجینئر بھی افسران کی ملی بھگت سے کام کرتا رہا جس کو اب موجودہ حکومت کے دور میں نوکری سے نکالا گیا ہے مگر اس کے ذریعے قومی خزانے کو پہنچنے والے نقصان کی کسی نے اب تک انکوائری نہ کروائی ہے بلکہ اس کے دور میں جاری ہونے والے ترقیاتی کاموں کے ورک آرڈرز پر اب کام مکمل کروائے جا رہے ہیں ڈیرہ بھنگواں اور لاہور روڈ کے فیکٹری ایریا میں برخاست شدہ جعلی سب انجینئر کے ذریعے شروع کروائے جانے والے ترقیاتی کاموں میں اس کے بعد سنگین کرپشن کی گئی ہے

اس درخواست کی نقول وزیر اعظم عمران خان وزیر اعلیٰ پنجاب اور ڈی جی اینٹی کرپشن کو بھی بھیجی گئی ہیں دریں اثناء محکمہ لوکل گورنمنٹ اینڈ کمیونٹی ڈویلپمنٹ کے مذکورہ افسروں اہلکاروں نے درخواست میں لگائے جانے والے الزامات کی تصدیق نہ کی ہے