وزیر خارجہ کا ماحولیاتی تبدیلی سے آگاہی دینے کا انوکھا طریقہ

کنبیرا: تووالو کے وزیر خارجہ نے ماحولیاتی تبدیلی سے آگاہی دینے کا انوکھا طریقہ اپنا لیا۔

باغی ٹی وی : گلاسگو کانفرنس میں جزیرہ نما ملک تووالو کے وزیر خارجہ سائمن کوفے نے منفرد اندازاپنالیا گھٹنوں تک سمندری پانی میں کھڑے ہوکر تقریر کی ان کے پانی میں کھڑے ہو کر تقریر کرنے کا مقصد یہ دکھانا تھا کہ نچلی سطح پر واقع بحرالکاہل کے جزیروں کے عوام موسمیاتی تبدیلیوں سے متاثر ہونے میں صف اول پر ہیں۔

خبررساں ادارے کے مطابق اپنے چھوٹے سے ملک پر موسمیاتی تبدیلیوں کے اثرات کو ظاہر کرنے کے لیے، جزیرہ تووالو کے وزیر خارجہ نے سمندر کے پانی میں کھڑے ہو کر اقوام متحدہ کی موسمیاتی تبدیلی کانفرنس، جسے COP26 بھی کہا جاتا ہے، سے خطاب کیا جہاں علاقائی رہنما موسمیاتی تبدیلی کے اثرات کو محدود کرنے کے لیے مزید جارحانہ کارروائی پر زور دے رہے ہیں۔

انہوں نے کہا کہ”تووالو میں، ہم موسمیاتی تبدیلی اور سطح سمندر میں اضافے کی حقیقت کودیکھ رہے ہیں۔ جیسا کہ آپ آج مجھے COP26 میں دیکھ رہے ہیں، ہم تقریروں کا انتظار نہیں کر سکتے جب سمندر ہمارے اردگرد ہر وقت بلند ہوتا ہے،‘‘ انہوں نے کانفرنس کرنے والوں پر زور دیا کہا کہ ہم اپنے اردگرد پانی کی سطح بلند ہوتے نہیں دیکھ سکتے انہوں نے مزید کہا کہ وہ صرف تووالو کی بات نہیں کر رہے بلکہ سب کے مستقبل کو محفوظ بنانے کے لیے پوری دنیا کی بات کررہے ہیں-

خبر رساں ادارے رائٹرز کے ساتھ ایک انٹرویو جو وائرل ہو چکا ہے، سائمن کوفے نے بدھ کو کہا کہ یہ ویڈیو ایک ایسے علاقے میں ریکارڈ کی گئی تھی جو کبھی خشک زمین تھا۔ جیسے ہی ویڈیو ختم ہوتی ہے، کوفے کے پیچھے پانی میں ایک کنکریٹ کا سلیب نظر آتا ہے، جس کے بارے میں ان کا کہنا ہے کہ یہ ایک بڑی بندوق کا اڈہ تھا جسے دوسری جنگ عظیم میں استعمال کرنے کے لیے امریکہ نے بنایا تھا۔

کوفے نے کہا کہ آئیڈیا ان حقائق کے بارے میں کانفرنس میں ایک طاقتور پیغام بھیجنا تھا جن کا جزیرے کے ممالک کو سامنا ہے۔ انہوں نے کہا کہ تووالو ایک بدترین صورتحال کا تصور کر رہا ہے، جہاں لوگ نقل مکانی پر مجبور ہیں کیونکہ ان کی زمین زیر آب ہے۔ جزیرے کے ممالک قانونی راستوں پر غور کر رہے ہیں جس میں وہ اپنے سمندری علاقوں کی ملکیت برقرار رکھ سکتے ہیں۔

تووالو جیسے چھوٹے جزیرے والے ممالک 2015 کے پیرس موسمیاتی معاہدے میں 1.5 ڈگری سیلسیس وارمنگ تھریشولڈ کو اپنانے کو یقینی بنانے میں اہم تھے۔

وزیر خارجہ تووالو کی سوٹ اور ٹائی میں سمندر میں کھڑے تصاویر سوشل میڈیا پر بڑے پیمانے پر شیئر کی گئی ہیں۔ جس نے سمندر کی بڑھتی ہوئی سطح کے خلاف تووالو کی جدوجہد کی طرف توجہ مبذول کرائی ہے۔

موسمیاتی تبدیلی کانفرنس میں ملکوں پر زور دیا گیا ہے کہ وہ آلودہ گیسوں کے اخراج میں کمی کے حالیہ اہداف کو بڑھانے کے لیے اقدامات کریں کوپ 26 موسمیاتی معاہدے کے ابتدائی مسودے میں پہلی بار کوئلے، تیل اور گیس پر دی جانے والی سبسڈی مرحلہ وار ختم کرنے کا مطالبہ کیا گیا ہے۔