حکومت وعدہ کے مطابق فاٹا کے عوام کو ٹیکس میں‌ 5 سال کی چھوٹ دے، سینیٹر مرزا محمد آفریدی

سینیٹر مرزا محمد آفریدی نے حکومت پاکستان سے مطالبہ کیا ہے کہ سابق فاٹا کو ٹیکس میں اعلان کے مطابق پانچ سال کے لیے چھوٹ دی جائے اور حکومت اس حوالے سے اپنے وعدہ پورا کرے.

باغی ٹی وی کی رپورٹ کے مطابق منگل کو سینیٹر مرزا محمد آفریدی نے گفتگو کرتے ہوئے کہا کہ فاٹا کے ایک نمائندہ کی حیثیت سے یہ میری ذمہ داری ہے کہ حکومت کی توجہ اس امر کی طرف مبذول کرواؤں‌۔ فاٹا میں نہ صرف ٹیکس کے نظام کو بہتر بنانے کی ضرورت ہے جبکہ فاٹا کی عوام کو ٹیکس میں مناسب رعایت بھی دی جانی چاہیے۔

ان کا کہنا تھا کہ حکومت کو فاٹا کے عوام سے 5 سالہ ٹیکس چھوٹ کے وعدہ کی پاسداری بھی رکھنی چاہیے جس کی مدت کا اعلان جون 2023 تک کا تھا۔ واضح رہے کہ حکومت کی جانب سے وعدہ کیا گیا تھا کہ فاٹا کے عوام کو پانچ سال کیلئے ٹیکس کی چھوٹ دی جائے گی.