ہزاروں رانا ثناء‌اللہ گرفتار ہو جائیں‌ ہمارے حوصلے پست نہیں‌ ہوں‌ گے، مریم اورنگزیب

پاکستان مسلم لیگ ن کی ترجمان مریم اورنگزیب نے رانا ثناء اللہ کی گرفتاری پر شدید ردعمل ظاہر کرتے ہوئے کہا ہے کہ ملک میں جنگل کا قانون نہیں چل سکتا.

باغی ٹی وی کی رپورٹ‌ کے مطابق انہوں نےکہاکہ ہمارے حوصلے اور ہمت کو کمزور نہیں کیاجاسکتا، آج بسوں کابند ہونا دکھانا چاہیے تھا، ریلوے کا بند ہونا دکھانا چاہیے تھا. مسلم لیگ ن ڈٹ کرکھڑی ہے اور مقابلہ کرے گی. جتنی مرضی گرفتاریاں کرلیں ہم چوراورنالائق حکومت کو بے نقاب کریں گے.

مریم اورنگزیب نے کہاکہ چاہے ہزاروں راناثناءاللہ گرفتارہوجائیں ہمارے حوصلے پست نہیں ہوں گے،

واضح رہے کہ یہ گرفتاری اینٹی نارکوٹکس فورس (اے این ایف) کی جانب سے منشیات فروشوں سے تعلق کے الزام میں کی گئی ہے۔ اے این ایف ذرائع کا کہنا ہے کہ رکن قومی اسمبلی رانا ثناءاللہ خان کے متعدد منشیات فروشوں سے تعلقات ہیں جبکہ اسی طرح ان کے کالعدم تنظیموں سے بھی مبینہ طور پر رابطے ہیں جس کے باعث انہیں تحویل میں لے لیا گیا ہے۔ سابق صوبائی وزیرقانون رانا ثناء اللہ کا نام سانحہ ماڈل ٹاؤن کے مرکزی ملزمان کے طور پر بھی لیا جاتا ہے تاہم ابھی تک ان کی گرفتاری کی وجوہات میں سے بڑی منشیات فروشوں‌ سے مبینہ تعلق بتایا جاتا ہے. مسلم لیگ ن کے ذرائع نے بھی رانا ثناء اللہ کی گرفتاری کی تصدیق کر دی ہے.

کہا گیا ہے کہ راناثناءاللہ سے اس معاملے پر تحقیقات کی جارہی ہیں ۔ اے این ایف نے رانا ثناءاللہ کو پوچھ گچھ کیلئے تحویل میں لیا ہے اور اگر وہ سوالوں کے جواب دینے میں ناکام ہوئے تو انہیں با ضابطہ طور پر گرفتار کرلیا جائے گا۔ دوسری جانب مسلم لیگ ن پنجاب کی سیکرٹری اطلاعات عظمیٰ بخاری نے کہا ہے کہ راناثناءاللہ کوگرفتارکرلیاگیا ہے۔ رانا ثناء اللہ کی گرفتاری کے بعد ان کا ذاتی موبائل نمبر بند ہوگیا ہے جبکہ ان کے سکیورٹی گارڈز اور ڈرائیور کا نمبر بھی بند ہے۔ واضح رہے کہ حالیہ دنوں‌ میں مسلم لیگ ن میں ٹوٹ پھوٹ بھی نظر آتی ہے.