عمران خان کا ایم کیو ایم کو ایک اور وزارت دینے پراتفاق

موجودہ حکومت کا ایم کیو ایم کو ایک اور وزارت دینے پر اتفاق ہو گیا.

تفصیلات کے مطابق موجودہ حکومت کا ایم کیو ایم کو ایک اور وزارت دینے پر اتفاق ہو گیا. وزیر اعظم عمران خان نے ملاقات کے دوران جمہوری عمل میں ایم کیو ایم کے مثبت کردار کو سراہا اور کہا کہ کراچی ملک کی ترقی میں اہم کردار ادا کرتا ہے اسے نظر انداز نہیں کیا جا سکتا۔

عمران خان کا کہنا تھا کہ کراچی اور حیدرآباد کے میئرز کو مالی پیکیج بھی دیا جائے گا اور دونوں میئرز کو بااختیار بنانے کی ضرورت پر بھی زور دیا گیا۔

وزیر اعظم آفس کی جانب سے جاری اعلامیے کے مطابق عمران خان نے وفاقی وزیرِ قانون اور گورنر سندھ پر مشتمل کمیٹی کو ٹاسک دے دیا ہے، کمیٹی دو روز میں طریقہ کار وضع کر کے وزیر اعظم کو اپنی سفارشات پیش کرے گی۔

واضح رہے کہ پاکستان تحریک انصاف کی حکومت میں متحدہ قومی موومنٹ کے پاس انفارمیشن ٹیکنالوجی اور قانون کی دو وزارتیں ہیں۔ ڈاکٹر خالد مقبول صدیقی وزیر آئی ٹی، جب کہ فروغ نسیم وزیر قانون ہیں۔