پاک فوج کے شعبہ تعلقات عامہ (آئی ایس پی آر) کی جانب سے پاکستانی ثقافت و تہذیب کو اجاگر کرنے کے لیے مختصر دستاویزی فلمی مقابلے کا اعلان کیا گیا ہے۔
باغی ٹی وی : پاک فوج کے شعبہ تعلقات عامہ (آئی ایس پی آر) کی جانب سے ’نیشنل ایمیوچیو شارٹ فلم فیسٹیول‘ کے نام سے پلیٹ فارم کا انعقاد کیا گیا ہے جس میں بالخصوص پاکستان کے نوجوانوں کو اپنے فن کے ذریعے غیر معمولی صلاحیتوں کو اجاگر کرنے کا موقع دیا جا رہا ہے۔
مذکورہ فلم فیسٹیول کے ذریعے نوجوان فلم ساز 6 مختلف کیٹیگریز میں اپنی دستاویزی و فیچر فلمیں ایوارڈز کے لیے جمع کروا سکیں گے۔فلم فیسٹیول کی بنائی گئی ویب سائٹ کے مطابق نوجوان فلم ساز مذکورہ 6 کیٹیگریز پر اینیمیٹڈ اور فکشن سمیت دستاویزی فلمیں بھی جمع کرواسکتے ہیں۔
فیسٹیول میں تمام کیٹیگریز میں دو طرح کی فلمیں جمع کروائی جا سکتی ہیں، جس میں سے موبائل فون پر ریکارڈ کی گئی یا بنائی گئی فلمیں بھی شامل ہیں جب کہ دوسری وہ فلمیں جو عام فلمی انداز میں کیمروں اور دیگر ٹیکنالوجی سے بنائی گئی ہوں۔
فلم فیسٹیول میں مذکورہ تمام کیٹیگریز میں سے ایک فلم کو ’بہترین فلم‘ کا ایوارڈ دیا جائے گا جب کہ دیگر تین ایوارڈز بھی فلم سازوں کو دیے جائیں گے۔
فیسٹیول میں شرکت کرنے والے فلم سازوں کو ’بہترین فلم‘ کے علاوہ ’جیوری اپریسیئشن ایورڈز اور اسکل سیٹ ایوارڈز‘ بھی دیے جائیں گے علاوہ ازیں ایوارڈز جیتنے والے فلم سازوں کو اعلیٰ فلمی تعلیم کے لیے اسکالر شپس بھی فراہم کی جائیں گی۔
فیسٹیول میں شرکت کے خواہش مند فلم ساز اپنی 10 سے 12 منٹ دورانیے کی مختصر فلمیں مقابلے کے لیے جمع کروا سکتے ہیں۔
مختصر فلموں کے عنوان میں پاکستان کے رنگ، وادی سندھ کی قدیم تہذیب، پاکستانی ثقافت و ہم آہنگی، چھوٹی صنعتیں و خوشحالی، پاکستان میں فلاحی کام اور زرعی مصنوعات کی قدر افزائی شامل ہیں۔ اس فیسٹیول میں حصہ لینے کے لیے باقاعدہ طور پر اصول و ضوابط موجود ہیں۔
اس فیسٹیول میں حصہ لینے کے لیے باقاعدہ طور پر اصول و ضوابط موجود ہیں۔فیسٹیول میں شامل کیے گئے موضوع میں دلچسپی رکھنے والے نوجوان کو یکم جنوری 2021ء سے قبل رجسٹریشن کروانی ہوگی جب کہ دستاویزی فلم کا پروجیکٹ جمع کرانے کی تاریخ 10 مارچ 2021ء ہے۔
فیسٹیول میں شرکت کے خواہش مند نوجوان فلم ساز (نساف) کی ویب سائٹ کے ذریعے آن لائن رجسٹریشن کرواسکتے ہیں۔
علاوہ ازیں فلم سازوں کو یہ سہولت بھی دی گئی ہے کہ اگر انہوں نے پہلے سے ہی کوئی دستاویزی یا مختصر فیچر فلم بنا رکھی ہے تو وہ بھی ایوارڈز کے لیے بھجوا سکتے ہیں۔تاہم اس ضمن میں بتایا گیا ہے کہ جنوری 2018 سے قبل کی کسی دستاویزی یا فیچر فلم کو قبول نہیں کیا جائے گا۔
نیشنل ایمیوچیو شارٹ فلم فیسٹیول میں نوجوان نسل کی صلاحتیوں کو سامنے لانے کے لیے شوبز سے وابستہ فنکاروں نے فیسٹیول کی افتتاحی تقریب میں شرکت کی جہاں انہوں نے نوجوانوں کو پاکستان کا اصل چہرہ دنیا کو دکھانے کے لیے زور دیا۔
آئی ایس پی آر کی جانب سے نوجوان فلم سازوں کے لیے مقابلے اور ایوارڈز کے مذکورہ منصوبے میں اداکارہ ماہرہ خان، ہمایوں سعید، اقرا عزیز اور گلوکار فرحان سعید سمیت دیگر شوبز شخصیات بھی جیوی کا حصہ ہیں۔
